Бонки Аврупоии таҷдид ва рушд (БАТР) ва Бонки осиёии рушд (БОР) бо пешниҳоди маҷмӯи маблағгузорӣ дар ҳаҷми 110 миллион доллар дар баланд бардоштани самаранокии ширкати энергетикии давлатӣ «Шабакаҳои Тақсимоти Барқ» (ШТБ), ки масъули тақсимоти нерӯи барқ дар Tоҷикистон мебошад, саҳми худро мегузоранд.
Маблағгузорӣ дар ҳаҷми то 25 миллион доллари ИМА аз қарзи БАТР, ки аз ҷониби давлат кафолат дода шудааст ва гранти БОР дар ҳаҷми 85 миллион доллари ИМА, иборат аст, зикр мегардад дар иттилоияи БАТР.
Гуфта мешавад, он ҷорӣ намудани системаҳои пешқадами баҳисобгирии нерӯи барқ ва навсозии шабакаҳои нерӯи барқро дар ҳафт шаҳр дар саросари Тоҷикистон маблағгузорӣ мекунад.
“Лоиҳае, ки дастгириро дар насби таҷҳизоти низоми биллингӣ ва мусоидат дар навсозии шабакаҳои нерӯи барқ пешбинӣ мекунад, дар пойтахти кишвар шаҳри Душанбе ва инчунин дар шаҳру ноҳияҳои Бӯстон, Данғара, Конибодом, Исфара, Истаравшан ва Панҷакент амалӣ мегардад”, – омадааст дар иттилоия.
Интизор меравад, ки татбиқи лоиҳа ба коҳишдиҳии ҳаҷми талафоти энергетикии ШТБ ба тақрибан 30 ГВтсоат ва кам кардани партовҳои СО2 қариб ба 2000 тонна дар як сол, оварда мерасонад.
Лоиҳаи аз ҳама охирини БАТР дар доираи Барномаи баланд бардоштани самаранокии истифодаи нерӯи барқ дар Тоҷикистон ба таъсис додани ҷойҳои нави корӣ барои ҷавонон дар ҷойҳо низ ёрӣ мерасонад.
Қобили зикр аст, ки то имрӯз БАТР тавассути амалисозии 140 лоиҳа дар иқтисодиёти Тоҷикистон 765 миллион Евро сармоягузорӣ намудааст.
Бонки осиёии рушд аз соли 1998 ба ҷумҳурӣ ҳудуди 2,2 млрд доллар ҷудо намуд, ки 1,6 млрд доллараш грантҳо мебошанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
