Вазорати тандурустӣ омори нави сироятёбӣ дар 24 соати гузашта дар ҷумҳуриро нашр кард, ки мувофиқи он аз шоми 23-юми июн то кунун ҳамагӣ 13 нафар сироят ёфтааст. Бар тибқи ин маълумот 11 нафар аз шумораи онҳое, ки аз 21-уми июн ба ин сӯ гирифтор шудаанд, шифо ёфтаанд.
"Дар маҷмӯъ, аз аввали бақайдгирӣ то имрӯз, 24 июн дар кишвар 13371 нафар гирифторони сирояти коронавируси нави COVID-19 ба қайд гирифта шуда, аз ин шумора то санаи зикргардида 13229 нафар (98,9%) шифо ёфтаанд".
Ин омори Вазорат дар ҳолест, ки Раҷаббой Аҳмадзода раиси вилояти Суғд шумораи гирифторони илтиҳоби шуш ва коронавирусро дар ин вилоят то 22-юми июн 45 нафар гуфт, ки аз ин шумора танҳо 8 нафарашон гирифтори коронавирус будаанд.
Бино ба гузориши телевизиони маҳаллии “СМ-1” дар Хуҷанд Раҷаббой Аҳмадзода дар ин бора расман зимни таҷлил аз ҷашни “Ваҳдат”, ки рӯзи 23-уми июн дар “Кохи Рӯдакӣ” доир шуд иттилоъ додааст. Ӯ аз фаъолону, роҳбарони сохторҳои гуногун даъват кардааст бо мардум корбарӣ кунанд, чораҳои беҳдоштиву поксозиро тақвият бахшанд ва ба воҳима дода нашаванд.
“Дар хонаҳо низ беморон ҳастанд, мо хона ба хона гашта дар сурати муайян шудани беморӣ тез ба хонаи алоҳида ҷой кунем, имрӯз боду ҳаво ҳам хуб аст. Мо шароитҳоро фароҳам овардем ва бояд бо мардум бошем. Ба хусус калонсолон худатонро эҳтиёт кунед”.
Ба таъкиди раиси Суғд мутахассисони соҳаи тандурустӣ дар мубориза бо бемории ҳамагир басанда ҳастанд ва ҳудуди 800 нафар корманди идораи беҳдоштиро ба корҳои поксозию тарғиботӣ пурра сафарбар кардаанд. Дар назар аст ба вилояти Суғд 100 ҳазор воя ваксина ворид шавад ва кормандони тиб, соҳаи маориф, ниҳодҳое, ки бевосита дар робитаи зич бо мардум кор мекунанд ва сокинони аз 60-сола боло эм карда шаванд.
Вазорати тандурустии Тоҷикистон ахиран рӯзи 21-уми июн эълон кард, ки дар Тоҷикистон дигарбора коронавирус ба қайд гирифта шудааст. Дар се рӯзи гузашта санаи 21-уми июн 17 нафар, 22-уми июн 15 нафар ва 23-уми июн 18 нафар дар умум давоми се рӯз 50 нафар ба COVID-19 ба қайд гирифта шудааст. Дар умум шумори беморони коронавирус дар Тоҷикистон то шоми 23-юми июн ба ба 13358 нафар расида буд
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
