Қисмати даромади буҷети давлатии Тоҷикистон дар зарфи ду моҳи соли ҷорӣ ба миқдори 220 млн сомонӣ (17 млн доллар) барзиёд иҷро шуд.
Ҳаҷми умумии буҷети давлат дар моҳҳои январ-феврал ҳудуди 4,6 млрд сомонӣ (355 млн доллар)-ро ташкил дод, ки 4,8% зиёдтар нисбат ба нақшаи тасҳеҳшуда мебошад, хабар медиҳад Вазорати молияи ҷумҳурӣ.
Моҳи январи имсол буҷет ба андозаи 7,1% барзиёд иҷро шуд: ба ҷойи 1 млрд 970 млн сомонии дар нақша пешбинишуда ба буҷет ҳудуди 2 млрд 120 млн сомонӣ маблағ ворид шуд.
Барзиёд будани нишондиҳандаҳо, дар навбати аввал ба афзоиши маблағҳо аз пардохти андоз, аз ҷумла афзоиши ҳаҷми андозҳои асосӣ – андоз аз арзиши иловашуда (ААИ) ва андоз аз даромад вобаста дониста мешавад.
Ҳиссаи маблағҳо аз пардохти андозҳо дар ҳаҷми умумии даромадҳои Буҷети давлатӣ дар моҳи январи соли равон 78,3%-ро ташкил дод.
Қобили зикр аст, ки тайи солҳои ахир иҷрои қисмати даромади буҷет дар моҳҳои аввал доимо муяссар намегардид. Ба ин тариқ, дар ду моҳи аввали соли 2021 ба буҷет зиёда аз 100 млн сомонӣ камтар маблағ ворид гардида буд, ки ба пурра пардохт нашудани маблағҳо аз пардохти андоз марбут дониста мешуд.
Ёдрас мекунем, ки аз 1 январи соли ҷорӣ Кодекси нави андоз мавриди амал қарор гирифта, дар он пардохти баъзе андозҳо нисбатан сабук шуданд. Масалан, меъёри маъмулии ААИ, ки беш аз 40%-и воридоти маблағ аз пардохти андозҳоро ташкил медиҳад, аз 18% то ба 15% поин бурда шуд.
Ҳукумати Тоҷикистон ният дорад, ки соли равон даромади буҷети кишварро ба андозаи 19,4% зиёд кунад. Қисмати даромади буҷет ба маблағи 33 млд сомонӣ (2,5 млрд доллар) тасдиқ шудааст.
Сарчашмаҳои асосии воридоти маблағ ба буҷети Тоҷикистон мудом пардохти андозҳо дониста мешаванд, ки ҳиссаи онҳо дар даромади “ҳамёни асосӣ”-и кишвар тайи даҳсолаи ахир (солҳои 2012-2021) 68%-ро ташкил медиҳад.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
