Аз мағоза ба хона баргашта, дидед, ки маҳсулоти муҳлати истифодааш гузаштаро харидаед. Қариб ҳама бо чунин ҳолат дучор шудаанд. Албатта, пеш аз харидани чизе ҳатман санаи муҳлати коршоямии маҳсулотро санҷидан лозим аст, лекин аксаран мо шитоб дорему ё аз кор хаста шуда, хотирпарешонем.
Мутаассифона, дар Тоҷикистон аксарияти истеъмолгарон аз талаботи қонунгузорӣ нисбат ба маҳсулоти ғизоӣ огаҳӣ надоранд.
Агар ба шумо молу маҳсулоти муҳлати истифодааш гузаштаро фурӯхта бошанд, чӣ гуна мебояд рафтор кард? Барои шарҳи масъала ба Иттифоқи истеъмолгарони Тоҷикистон муроҷиат кардем.
Маълум шуд, ки муофиқи қонуни Тоҷикистон “Дар бораи ҳифзи ҳуқуқҳои истеъмолгарон”, натанҳо фурӯши маҳсулоти муҳлати истифодааш гузашта, балки маҳсулот бидуни зикри санаи истеҳсол, муҳлати коршоямӣ, таркиби маҳсулоти ғизоӣ, бидуни номгӯй ё зикри шароити нигаҳдорӣ низ риоя накардани талаботи қонун шуморида мешавад. Ин гуна маълумот бояд бо забони фаҳмо барои итсеъмолгар – тоҷикӣ ё русӣ зикр шуда бошад.
Чӣ метавон кард, агар шумо бо маҳсулоте, ки бо риоя нашудани талаботи қонунгузорӣ ба фурӯш гузошта шудааст, дучор шавед?
Дастурамал барои истеъмолгарон
Дастурамали зина ба зина муайян кардани далели мавҷуд будани камбуду норасоиҳо дар маҳсулот (маводи ғизоӣ) ва минбаъд чӣ гуна амал карданро дар чунин ҳолатҳо манзур мекунем:
1. Далели як ё ду ҳолати қонуншиканиро дар маҳсулот (маводи ғизоӣ) муайян кунед. Ин метавонад муҳлати гузаштаи истеъмол, ҷой надоштани маълумот дар бораи маҳсулот (таркиб, калория, вазн, истеҳсолкунанда ё воридкунанда), шароити нигаҳдорӣ барои маҳсулоти зудвайроншаванда) бошад.
2. Далели мавҷуд будани қонуншикнаиро дар смартфони худ сабт кунед.
3. Ба яке аз сохторҳое, ки дар охири хабар зикр шудааст, муроҷиат намуда, маълумоти зеринро пешниҳод намоед:
– навъи қонуншиканӣ (маҳсулоти муҳлати истифодааш гузашта, маҳсулоти бидуни тамға ё маълумот бо забони нофаҳмо ва ғайра);
– суроғаи мағоза ё нуқтаи фурӯш (хуб мешуд агар ягон макон ё мавзеи наздики он номбар шавад;
– фиристодани сурати далели қонуншикание, ки дар смартфонатон сабт шудааст.
Ба куҷо метавон шикоят кард?
Вақти муроҷиат мушаххас кардани ному насаби шахсе, ки шикояти шуморо қабул кард, муҳим аст, то ки шумо дар оянда аз натиҷаи баррасии шикоятатон огаҳ шуда тавонед.
Маълумоти дар боло зикршударо шумо метавонед ба рақами Viber-и Агентии “Тоҷикстандарт” бо рақами 988 50 2222 ё сомонаи Иттифоқи истеъмолгарони Тоҷикистон – www.istemol.tj ирсол намоед.
Ҳамчунин дар бораи қонуншиканӣ шумо тариқи телефон метавонед ба сохторҳои зерини ҳифзи ҳуқуқи истеъмолгарон муроҷиат кунед:
Агентии «Тоҷикстандарт» – (+992 37) 233 44 99
Хадамоти санитарӣ-эпидемиологӣ – (+992 37) 222 21 25
Хадамоти зиддиинҳисории назди ҳукумати ҷумҳурӣ – (+992 37) 236 50 08
Иттифоқи истеъмолгарони Тоҷикистон – (+992 37) 224 14 04.
