Дар шаҳри Душанбе роҳи мошингарди дусатҳа дар буриши кӯчаҳои Саъдии Шерозӣ ва Ҳофизи Шерозӣ бо пайваст шудан ба кӯчаи Абдулаҳад Қаҳҳоров сохта мешавад. Созишнома дар ин бора ҳанӯз 29-уми апрел бо Бонки аврупоии таҷдиду рушд ба имзо расида буд, хабар медиҳад Вазорати молияи Тоҷикистон.
Вазири молияи Тоҷикистон Файзиддин Қаҳҳорзода ва президенти Бонки аврупоии таҷдиду рушд (БАТР) Одил Рено-Бассо он замон дар бораи маблағгузории лоиҳаи "Сохтмони роҳи автомобилгарди дусатҳа дар чорроҳаи С. Шерозӣ ва Ҳ. Шерозӣ пайваст ба кӯчаи А. Қаҳҳорови шаҳри Душанбе" ва илова ба Созишномаи қарзии лоиҳаи "Барқарорсозии системаи обтаъминкунӣ ва обпарто дар ноҳияи Файзобод" созишномаи қарзӣ ба имзо расониданд.
ИЗОБРАЖЕНИЕ
Гуфта мешавад, ҳадафи татбиқи созишномаи лоиҳа баланд бардоштани самаранокӣ ва беҳтар намудани ҳаракати воситаҳои нақлиёт, паст намудани ҳолатҳои тамбашавӣ ва таъмини бехатарии ҳаракати нақлиёт ва пиёдагардҳо дар ҳудуди шаҳри Душанбе мебошад.
Маблағи созишномаи мазкур 28 млн 450 ҳазор евроро ташкил намуда, аз ҳисоби маблағҳои қарзии БАТР маблағгузорӣ мешавад.
Санади дигар лоиҳаи «Барқарорсозии системаи обтаъминкунӣ ва обпарто дар ноҳияи Файзобод» ба барқарорсозӣ ва васеъ намудани инфрасохтори хизматрасонии соҳаи обтаъминкунию беҳдошт ва беҳтар намудани дастрасии аҳолии ноҳияи Файзобод ба оби нӯшокӣ, инчунин баланд бардоштани устувории фаъолияти молиявии корхонаи хизматрасонии ноҳия равона мешавад.
Маблағи иловагӣ ба Созишномаи қарзии лоиҳаи мазкур 1 млн 350 ҳазор евроро ташкил намуда, ин ҳам аз ҳисоби маблағҳои қарзии БАТР барои пӯшонидани норасоии маблағ дар татбиқи лоиҳа ҷудо карда мешавад.
Микрорайонҳои нави Душанбе
Қаблан “Азия-Плюс” дар бораи чӣ гуна тағйир ёфтани хиёбони Саъдии Шерозӣ хабар дода буд. Мувофиқи нақша, хиёбон аз кӯчаи Неъмат Қарарбоев то кӯчаи Ҷаббор Расулов навсозӣ мешавад.
ИЗОБРАЖЕНИЕ Хиёбони Саъдии Шерозӣ аз кӯчаи Неъмат Қаррабоев то кӯчаи Ҷаббор Расулов
Ба ҷуз биноҳои истиқоматӣ, дар ин мавзеъ биноҳои маъмуриву ҷамъиятӣ ва савдо, муассисаҳои тиббӣ ва маориф сохта мешаванд. Ҳамаи биноҳо бо услуби муосир бунёд мегарданд.
ИЗОБРАЖЕНИЕ Тибқи лоиҳа эсткадаи назди Сирк чунин хоҳад шуд
Ҳамчунин хабар дода будем, ки дар кӯчаи Абдулаҳад Қаҳҳоров – аз хиёбони Саъдии Шерозӣ то кӯчаи Ҷанубӣ (Южная) чиҳо сохта мешаванд.
ИЗОБРАЖЕНИЕ Лоиҳаи тарҳрезии кӯчаи Қаҳҳоров аз хиёбони Саъдии Шерозӣ
Дар ин мавзеъ сохтмони 3 пул аз болои дарё ва якчанд пиёдагузарҳо пешбинӣ шудаааст. Дар кӯчаи Абай роҳи ҳалқавии дусатҳа сохта мешавад.
Тибқи лоиҳа биноҳо аз якчанд маҷмаа иборат буда, ҳар кадоме аз онҳо ҳалқаро ташкил медиҳанд. Дар атрофи ҳар як маҷмаа ва дар қаламрави дохилӣ бунёди мавзеъҳои сабз дар назар аст.Мувофиқи нақша, дарахтҳо дар канори роҳ шинонида мешаванд.
