Дар мактабҳои олии Тоҷикистон дар нимсолаи аввали соли равон 42 ҷинояти коррупсионӣ ба қайд гирифта шуда, дар робита ба онҳо 12 нафар боздошт шудаанд. Дар ин бора ба “Азия-Плюс” аз Агентии назорати давлатии молиявӣ ва мубориза бо коррпусияи ҷумҳурӣ хабар доданд.
Вобаста ба ин далелҳо бо моддаҳои 247 (Қаллобӣ) ва 340 (Сохтакорӣ, тайёр кардан ё ба соҳибияти каси дигар додани ҳуҷҷат, мукофоти давлатӣ, штамп, муҳр ва бланкаҳои қалбакӣ)-и Кодекси ҷиноятии Тоҷикистон парвандаҳои ҷиноятӣ оғоз ва ба баррасии додгоҳ фиристода шудаанд.
Дар Агентӣ рӯйхати муассисаҳои таълимӣ бо ишораи шумори ҷиноятҳо ва теъдоди боздоштшудагонро пешниҳод намуданд:
– Донишгоҳи давлатии Хуҷанд ба номи академик Бобоҷон Ғафуров – 30 ҷиноят, 2 боздоштшуда;
– Донишгоҳи миллии Тоҷикистон – 3 ҷиноят, 3 боздоштшуда;
– Донишгоҳи давлатии Данғара – 3 ҷиноят, 2 боздоштшуда;
– Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд – ҷиноят, 1 боздоштшуда.
Боз дар чор мактаби олӣ – Донишгоҳи ҳуқуқ, бизнес ва сиёсати Тоҷикистон, Донишкадаи кӯҳию металлургии Тоҷикистон, Донишкадаи омӯзгории Тоҷикистон дар Панҷакент ва Донишгоҳи давлатии омӯзгории ба номи Садриддин Айнӣ дар ҳар кадоме як ҷиноят ошкор шуда, 1-нафарӣ боздошт шудаанд.
Қаблан Агентии зиддифасоди ҷумҳурӣ зимни нишасти матбуотӣ фасодзадатарин соҳаҳо дар нимсолаи аввалро номбар кард. Соҳаи маориф ва илм бо сабти даҳҳо ҷинояти коррупсионӣ ва иқтисодӣ дар зинаи дуюм қарор гирифт.
