Милитсияи шаҳри Душанбе аз шаҳрвандон даъват намуд, ки ҳушёр бошанду ба фиреби шахсоне, ки худро маъюб вонамуд сохта, ба талбандагӣ машғуланд, бовар накунанд. Муроҷиати Раёсати ВКД-и пойтахт дар шабакаҳои иҷтимоӣ ва мессенҷерҳо нашр шудааст.
Бино ба маълумоти Раёсати ВКД, аксари онҳо маблағеро, ки аз ин ҳисоб ба даст меоранд, ба нӯшидани машрубот сарф мекунанд.
“Аз ин лиҳоз, аз шаҳрвандон хоҳиш карда мешавад, ки ба ҳиллаву макр ва мардумфиребии чунин афрод бовар накунанд, – омадааст дар муроҷиат. – Баръакс, ба хонаи ятимону бепарасторон ва кӯдакони имконияташон маҳдуд, хайру эҳсон намоед”.
Чанде пеш дар ҷараёни амалиёти фаврӣ ду тан аз чунин қаллобон боздошт шуданд. Яке аз онҳо Қувват Низомови 53-сола аст, ки ҳарчанд ҷисман солим аст, вале худро маъюб вонамуд сохта, ба талбандагӣ машғул мебошад. Нисбаташ маводҳои зарурӣ тартиб дода шуда, мавриди чораҷӯӣ қарор дорад.
Дар ҳолати дигар Ҳошимҷон Ҷумъаеви 48-сола боздошт шудааст, ки ӯ низ як дасти худро зери бағал пинҳон намуда, худро ҳамчун маъюбу дардманд вонамуд кардааст.
Дар натиҷаи санҷиш муайян гардид, ки Ҳошимҷон Ҷумаев ҷисман солим буда, ба ин васила маблағ ба даст меорад ва барои истеъмоли машрубот сарф мекард. Ҳодисаи мазкур мавриди чораҷӯӣ қарор дорад.
Ахиран мақомоти милитсияи Тоҷикистон, аз ҷумла милитсияи пойтахт оид ба ошкор сохтани категорияи муайяни шахсон чорабиниҳои гуногуни фаврӣ мегузаронад. Якез аз чунин чорабиниҳо, ки дар шабакаҳои иҷтимоӣ мавриди баҳс шуд, амалиёти “Ахлоқ” мебошад. Дар ҷараёни он дар қаҳвахонаву тарабхонаҳо занону духтарон барои суҳбат ва санҷиши гирифторӣ ба бемории ВНМО/БПНМ (ВИЧ/СПИД) боздошт мешаванд. Тавре ки қаблан дар Раёсати ВКД Душанбе хабар дода буданд, ҳадаф аз баргузории чунин чорабиниҳо пешгирии паҳншавии бемориҳои сироятӣ мебошад.
Ҳамчунин ҳодисаҳое низ зиёд мешаванд, ки мақомоти ҳифзи ҳуқуқ занону духтаронро гӯё барои рафтори ношоиста ва ғайриахлоқӣ дар шабакаҳои иҷтимоӣ боздошт мекунанд. Ин ҳодисаҳо мавриди баррасиву интиқод аз ҷониби ҷомеа қарор мегиранд.
Бисёре аз коршиносон ва фаъолон бар ин назаранд, ки мақомоти милитсияи Тоҷикистон ба “милитсияи ахлоқ” табдил ёфта, бо нақзи ҳуқуқи занон аз ҳадди ваколатҳои худ берун мебарояд.
Ҳуқуқшиносон мутмаинанд, ки дар ҳолати боздошти занони блогер аз лиҳози назариявӣ онҳоро бо моддаи 460-и Кодекси ҳуқуқвайронкунии маъмурии ҶТ (Майдаавбошӣ дар ҷойҳои ҷамъиятӣ) ҷазо додан имкон дорад. Аммо чун истилоҳҳои “шабакаи Интернет” ва “шабакаи иҷтимоӣ” дар Кодекси ҳуқуқвайронкунии маъмурӣ ҳамчун ҷойҳои ҷмаъиятӣ зикр нашудаанд, амали занону духтарони “гунаҳкор” ба сифати қонуншиканӣ дониста намешаванд.
Барои асоси қонунӣ доштани чунин боздошту ҷазоҳо, инчнуин назорати мундариҷаву муҳтаво дар шабакаҳи иҷтимоӣ, ба қонунгузорӣ тағйироту иловаҳо ворид намудан лозим аст.
