Сатҳи таваррум дар зарфи 11 моҳи соли ҷорӣ 3,4%-ро ташкил дод. Дар ин бора Агентии омори ҷумҳурӣ хабар медиҳад.
Аз ҷумла дар ин давра маҳсулоти хӯрокворӣ ба андозаи 2,7%, маҳсулоти ғайриозуқа – 3,9% ва хидматрасониҳои пулакӣ ба аҳолӣ – 4,7% қимат шуданд.
Сатҳи пасти тавррумро мақомот ба поинравии нархи мева (-10.8%), орд (-7,9%), шакар (-6.7%), сабзавот (- 4%) ва баъзе маҳсҳулоти дигар (ба андозаҳои нисбатан камтар) нисбат медиҳанд.
Мутахассисони соҳаи омори Тоҷикистон се сол пайдарпай дар бораи сатҳи рекордии пасти таваррум ҳисобот медиҳанд. Тибқи маълумоти Агентии омор, соли 2022 нарху тарифҳо ба андозаи 4,2% ва соли 2023 – ҳамагӣ 3,8% боло рафтанд. Сатҳи пасттарини тавррруми давоми солҳои соҳибистиқлолӣ танҳо дар соли 2013 ба қайд гирифта шуд, ки 3,7%-ро ташкил медод.
Дар ҳамин ҳол, дар кишварҳои шарики асосии тиҷоратии Тоҷикистон болоравии зиёди нархҳои истеъмолӣ ба мушоҳида мерасад. Бино ба маълумоти расмӣ, сатҳи таваррум дар зарфи 11 моҳи соли ҷорӣ дар Русия зиёда аз 9%, Қазоқистон – 8,4% ва Ӯзбекистон – 8,7%-ро ташкил медиҳад.
Агар начандон бо суръати баланд болоравии нарху тарифҳо то охири сол ҳамин хел идома ёбад, сатҳи таваррум аз рӯи натиҷаҳои сол дар сатҳи 3,7% хоҳад буд.
Нишондиҳандаи мақсадноки таваррум барои давраи миёнамуҳлат, ки аз ҷониби Бонки миллии Тоҷикистон муқаррар мешавад, мисли чанд соли охир дар ҳудуди 6,0% (±2 банди фоизӣ) боқӣ мемонад.
Бонки миллии Тоҷикистон тариқи тағйири меъёри бозтамвил ва/ё ҳаҷми пул дар гардиш метавонад ба таври муайян ба нархгузорӣ таъсир расонад. Боло бурдани меъёри бозтамвил ва кам кардани пул дар гардиш, ба сустшавии таваррум ва баръакс боис мегарданд. Бонкҳои марказии кишварҳои дорои иқтисоди бозаргонӣ дар сатҳи 5-6% (таварруми паст ё хазанда) нигоҳ доштани таваррумро афзал медонанд. Ин сатҳро иқтисодчииён беҳтарин (идеалӣ) барои рушди минбаъдаи кишвар мешуморанд, зеро коҳиши таваррум ё худ дефлятсия (поинравии нархҳо) нисбат ба болоравии баланди нархҳо хавфноктар аст.
