Охири ҳафтаи ҷорӣ, 2-юми марти соли 2025 дар Тоҷикистон интихоботи парлумонӣ баргузор мегардад. Дар он 6 ҳизби сиёсии кишвар барои 63 курсии парлумон вориди рақобат мешаванд.
Тибқи иттилои пешниҳодкардаи КМИР аз ҳавзаи ягонаи умумиҷумҳуриявӣ Ҳизби аграрии Тоҷикистон 13, Ҳизби ислоҳоти иқтисодии Тоҷикистон 13, Ҳизби демократи Тоҷикистон 3, Ҳизби сотсиалистии Тоҷикистон 6, Ҳизби коммунистии Тоҷикистон 6 ва Ҳизби халқии демократии Тоҷикистон 28 номзад пешниҳод кардаанд.
Дар умум, аз ҳавзаи ягонаи умумиҷумҳуриявӣ 68 номзад аз 6 ҳизби сиёсии кишвар барои 22 курсии парлумон ва 152 номзад аз ҳавзаи якмандатӣ барои 41 курсии дигар вориди корзори интихобот мешаванд.
Ҳоло ҳизбҳои сиёсӣ ва номзадҳо ба таблиғи барномаҳои худ машғуланд. Ҳамаи ин ҳизбзҳо ошкору пинҳон аз ҳукумат ҷонибдорӣ мекунанд ва коршиносони мустақил мегӯянд, онҳо дар фазои сиёсии кишвар таъсири муассире гузошта наметавонанд.
Мо барои хонандагон муҳимтарин нукоте, ки интихобкунанда бояд донад, ёдовар шудем.
