Шарифбек Давлатов, ҷаҳонгарди тоҷик то қитъаи Антарктида расида, парчами Тоҷикистонро дар нуқтаи баландтарини ин минтақаи яхбаста парафшон кардааст.
Ӯ дар доираи Соли байналмилалии ҳифзи пиряхҳо Шарифбек Давлатов ба ин қитъа сафар карда, бо таъкиди идеяи ваҳдати минтақавӣ дар баробари парчами Тоҷикистон ҳамзамон парчамҳои кишвраҳои ҳамсоя – Ӯзбекистону Қирғизистон ва Қазоқистону Туркманистонро низ парафшон кард.
Намояндаи ин ҷаҳонгард дар сӯҳбат бо “Азия-Плюс” аз номи ӯ гуфт, роҳ ба сӯйи Антарктида осону содда набуд:
“Барои расидан ба қитъаи сардтарин маро лозим омад, ки якчанд кишварҳои қитъаи Амрикои Лотиниро гузарам. Пас аз ин ман ба Антарктида расида, тариқи киштӣ чор рӯз дар уқёнус саёҳат кардам”, – гуфтааст ӯ.
Ҳангоми саёҳат ӯ шахсан бо оқибатҳои тағйироти иқлим аз наздик ошно гардида, тасмим гирифтааст, ки таваҷҷуҳи ҷомеаи ҷаҳониро ба масъалаи босуръат обшавии пиряхҳо ҷалб кунад.
“Дар Соли байнулмилалии ҳифзи пиряхҳо ин иқдом бахусус муҳим аст. Ин иқдом аҳамияти хосса дорад. Тайи солҳои соҳибистиқлолӣ парчами мо дар гӯшаҳои гуногуни ҷаҳон, ҳатто қариб 7 моҳ дар кайҳон парафшон шуд. Ҳамаи ин манбаи ифтихори миллӣ, рамзи ваҳдат ва ифтихору сарбаландии мост”, – гуфтааст ӯ.
Тибқи иттилои расмӣ, аз 14 ҳазор пиряхҳое, ки дар Тоҷикистон ҷойгир шудаанд, зиёда аз 1 ҳазораш пурра об шудааст.
Шарифбек Давлатов то ин дам аз 106 кишгвари саросари дунё боздид намуда, дар ҳар кадоме аз онҳо парчами Тоҷикистон парафшон намудааст. Ҳадафи аслии ӯ, тарғибу ташвиқ ва муаррифии таъриху фарҳанги ниёгон, роҳандозии муколама бо мардумони кишварҳои гуногуни ҷаҳон ҷиҳати ҷалби бештари сайёҳон ба Тоҷикистон мебошад.
Ӯ мегӯяд, ҳар куҷое буд, дар даст Парчами Тоҷикистон ва аксҳои манзараҳои нотакрори кишварро дошт, то ки онро ба хориҷиён нишон дода, сарзамини аҷдодиашро муаррифӣ кунад.
