Дар пайи садамаи мудҳише, ки дар ноҳияи Ҷаббор Расулови вилояти Суғд рух дода, боиси марги 6 нафар гардид, ронандаи сабабгори садама гардида боздошт шудааст. Ӯ ҳоло дар шифохона аст.
Садама рӯзи 29-уми май дар ноҳияи Ҷаббор Расулов рух дод. Ба иттилои ВКД, Дониёр Қубонбоев, ронандаи 23-солаи мошин “Опел-Комбо” ҳангоми ҳаракат дар роҳи ҷамоати деҳоти Гулхонаи ин ноҳия ба самти муқобил баромада, ба мошини “Опел-Зафира”, таҳти идораи Атохон Ҷумахмедови 36-сола бархӯрд.
Атохон Ҷумахмедов мураббии варзиш буд ва дар мошин шогирдонаш – варзишкорони наврас қарор доштанд.Дар пайи ин садама, ҳарду мошин оташ гирифт ва панҷ мусофир дар ҷойи ҳодиса ҷон бохтанд:
– Муслиҳиддин Мирзошавкатзода (16 – сола);
– Муҳаммадхон Асадхонзода (16 – сола);
– Ҳадятулло Сулаймонов (16 – сола);
– Атохон Ҷумахмедов (мураббии варзиш);
– Обидҷон Обидов (мусофири 31-солаи мошини “Опел-Комбо”).
Чор нафари дигар бо ҷароҳатҳои гуногун ба шифохона интиқол ёфтанд.
Бо гузашти 4 рӯз, Ҳасанҷон Юнусов 16-сола низ ҷон бохт. Ӯро рӯзи 3-юми июн ба хок супориданд.
Ҷамолиддин Халилзода, сардухтури Беморхонаи марказии ноҳияи Ҷаббор Расулов ба “Азия-Плюс” гуфт, 70% ҷисми Ҳасанҷон Юнусов сӯхта буд.
Ҳамин тавр, дар пайи ин садама, дар умум 6 нафар ҷон бохтанд, ки чаҳор нафари онҳо варзишгарони 16-сола буданд.
Наздикону пайвандони ҷонбохтагон нахостанд бо расонаҳо суҳбат кунанд.
Салмоншоҳ Сарварзода, ки ӯ низ 16-сола ва варзишгар аст, пояш шикастааст ва баъди як муддат табобат ба хона рухсат шудааст.
Иқболҷон Юнусов бошад, ҳоло дар шифохона бистарӣ аст. Табибон мегӯянд, барои наҷоти ӯ талош доранд.
Ҷамолиддин Халилзода гуфт, ки 58-60% ҷисми Иқболҷон Юнусов сӯхтааст, аз ин лиҳоз, вазъи ӯ ҳоло вазнин аст.
Дониёр Қубонбоев, ронандаи мошин “Опел-Комбо”, ки ВКД ӯро омили асосии садама гуфтааст, бо ҷароҳатҳои гуногун дар шифохона бистарӣ аст.
Акбар Шарифӣ, масъули матбуоти Раёсати ВКД дар вилояти Суғд ба "Азия-Плюс" гуфт, ки нисбати Дониёр Қурбонбоев барои вайрон кардани қоидаҳои ҳаракати роҳ ва истифодаи воситаҳои нақлиёт, ки аз беэҳтиётӣ боиси марги ду ё бештар шахсон гаштааст (қисми 3, моддаи 212 Кодекси ҷиноятии ҶТ) парвандаи ҷиноятӣ боз гардидааст. Ин банди қонун аз 5 то 10 соли зиндонро пешбинӣ мекунад
Ҳарчанд қарори боздошти ин ронанда содир шудааст, аммо бо назардошти вазъи саломатӣ, ӯ ҳоло дар бемористон зери назари кормандони мақомоти милитсия қарор дорад.
Тибқи иттилои расмӣ, соли гузашта дар пайи 1 ҳазору 233 садамаи нақлиётӣ 552 нафар (соли 2023 -1 ҳазору 111 садама – 519 кас) ҷон бохта, 1 ҳазору 353 нафар ҷароҳат бардоштаанд.
Мақомот мегӯянд, суръати баланд, вайрон кардани қоидаҳои сабқат ва ҷойивазкунӣ, риоя накардани фосила, гуфтугӯ бо телефони мобилӣ, омилҳои асосии садамаҳои нақлиётӣ мебошад.
