Илёс Ҳамзазода ва Парвина Хуршедзода, муовинони нави раиси шаҳри Исфара таъин шудаанд. Дар ин бора ҳукумати ин шаҳр хабар медиҳад.
Муаррифии онҳо, рӯзи 10-уми июн баргузор шуда, онҳо “бо розигии президент” ба ин мансаб таъин шудаанд.
Парвина Хуршедзодаи 40-сола ба курсии Мадина Бобоиён, ки моҳи марти соли равон вакили Маҷлиси намояндагон интихоб шуд, нишастааст. Хуршедзода, ки аз руйи ихтисос ҳуқуқшинос аст, аз моҳи апрели соли 2022 раиси ҷамоати деҳоти Навгилеми шаҳр буд.
Илёс Ҳамзазодаи 44-сола бошад ба ҷойи Муҳаммад Муҳиддинзода, ки чанд моҳ пештар Раёсати Оҷонсии зиддифасод дар вилояти Суғд барои фурӯши замин бар зидди ӯ ва чанд мансабдори дигари шаҳри Исафара парвандаи ҷиноятӣ боз карда буд, таъин гардидааст.
Муҳаммад Муҳиддинзода дар доираи ин парванда бо ҳукми Додгоҳи шаҳри Исфара 24 ҳазор сомонӣ ҷарима шуда буд. Ӯ баъди судури ҳукм ҳам як муддат дар мансаби давлатӣ кор мекард, ки он замон баҳсбарангез шуда буд.
Ӯ тақрибан 3 моҳ пеш аз вазифа барканор шуд ва муваққатан бекор будааст.
Илёс Ҳамзазода аз соли 2022 то таъин шудан ба ҳайси муовин сардори Раёсати кишоварзии шаҳр буд.
Исфара, ки яке аз шаҳрҳои наздисарҳадӣ дар шимоли кишвар аст, номаш чанд маротиба дар робита ба муноқишаҳои марзӣ бо Қирғизистон расонаӣ шуда буд.
