Ташкилоти қарзии хурди амонатии “Ҳумо” аз Бонки миллии Тоҷикистон иҷозатномаи расмии бонкдорӣ гирифт ва расман ба “Ҳумо Бонк” табдил ёфт.
Ба ин тартиб теъдоди бонкҳои тиҷоратии Тоҷикистон ба ҳолати кунунӣ ба 17 адад расид.
Бояд гуфт, “Ҳумо” беш аз 20 сол пеш бо ташаббуси CARE International дар Тоҷикистон чун фонди қарздиҳии хурд ва 15 корманду 225 ҳазор сомонӣ сандуқи қарзӣ таъсис ёфт.
Фирдавс Маюнусов, раиси “Ҳумо Бонк” гирифтани иҷозатномаи бонкдориро гувоҳи расидан ба сатҳи баланди рушди ташкилот, шаффофият ва устуворӣ номид.
“Иин оғози марҳалаи навест, ки барои рушду тавсеаи бештари хидматрасониҳо замина мегузорад ва дар баробари ин, масъулияти моро дучанд мекунад”, – гуфт Фирдавс Маюнусов.
Ҳамчунин, ӯ аз саҳми Ваисова Мавсуда Сариевна, роҳбари аввали ташкилот ёдовар шуда, таъкид намуд, ки “дидгоҳи равшан, устуворӣ ва роҳбарии хирадмандонаи ӯ пояи рушди устувор ва муваффақонаи “Хумо”-ро гузошт”
Фирдавс Маюнусов илова кард, ки “бо итминон ба марҳалаи нав ворид мешавем ва омодаем, ки дастовардҳои 20 соли ахирро ҳифз намуда, боз ҳам рушд диҳем”.
Зикр кардан ба маврид аст, ки давоми ду даҳсола “Ҳумо” ташаккул ёфт, рушд кард ва ду маротиба таҷдид гардида, ба яке аз муассисаҳои пешсафи молиявии кишвар табдил ёфт, ки ба аҳолӣ маҷмӯи васеи хизматрасониҳои молиявиро пешниҳод мекунад.
Як марҳалаи муҳими рушди минбаъда — шомил шудани “Ҳумо” ба таркиби холдинги байналмилалии сармоягузории Gojo & Company, Inc. (Ҷопон) буд, ки дар моҳи сентябри соли 2021 саҳмдори асосӣ гардид. Ин ҳамкорӣ имкон дод, ки на танҳо сармояи хориҷӣ ҷалб гардад, балки таҷрибаи беҳтарини байналмилалӣ дар самти идоракунӣ, масъулияти иҷтимоӣ ва рушди устувор ҷорӣ карда шавад.
Ҳамакнун, ки “Ҳумо Бонк” бонк шуд:
– зиёда аз 350 000 муштарӣ дар саросари Тоҷикистонро хизматрасонӣ мекунад;
– дорои 120 000 қарзгирандаи фаъол мебошад;
– ҳаҷми сандуқи қарзӣ зиёда аз 1,8 миллиард сомонӣ аст;
– ҳаҷми сандуқи амонатӣ зиёда аз 670 миллион сомонӣ аст;
– тақрибан 2000 нафарро дар саросари кишвар ба кор таъмин кардааст.
Минбаъд низ “Ҳумо Бонк” бо истифода аз дониш ва таҷрибаи дохилӣ ва кӯмаки байналмилалии Gojo & Company, Inc. фаъолияти худро бо мақсади тавсеаи дастрасии аҳолӣ ба хидматрасониҳои молиявӣ, дастгирии соҳибкории хурду миёна ва табдили рақамии хизматрасониҳои бонкӣ дар Тоҷикистон идома медиҳад.
“Ҳумо” яке аз ташкилотҳои пешбари молиявии Тоҷикистон буда, ба панҷгонаи калонтарин ширкатҳои молиявии кишвар дохил мешавад. Саҳмдори асосии ширкат — холдинги байналмилалии сармоягузории Gojo & Company (Ҷопон) мебошад, ки ба стратегияҳои рушди устувор ва фарогирии молиявиро арҷ мегузорад.
