Дар назар аст, ки аз 1-уми сентябри соли равон тамоми мактабҳои Тоҷикистон ба низоми баҳогузории 10-хола, ки чанд сол аст, баҳсаш идома дорад, гузаранд. Дар ин бора Раҳим Саидзода, вазири маориф ва илми Тоҷикистон имрӯз, 28-уми июл дар нишасти матбуотӣ иттилоъ дод.
Ба гуфтаи ӯ, аз ҷониби Вазорати маориф ва илми кишвар тамоми ҳуҷҷатҳои зарурӣ таҳия ва ба ҳукумати кишвар пешниҳод шудааст.
Ӯ афзуд, аллакай журналҳои синфие, ки барои баҳогузорӣ дар ин низом истифода мешавад, аллакай омода шудаанд.
Ба таъкиди номбурда, имрӯз дар донишгоҳу донишкадаҳои кишвар низоми 100-хола амал мекунад.
Гузариш ба низоми баҳогузории 10-хола дар ҳолест, ки қарор аст, мактабҳои Тоҷкиистон пас аз 4 сол ба низоми таҳсили 12-сола гузаранд. Айни замон омодагиҳо барои гузариш ба низоми нави таҳсил идома дорад.
Қаблан, Раҳим Саидзода дар як мусоҳиба бо ҳафтаномаи “Омӯзгор” гуфта буд, ки низоми 10-холаи баҳогузорӣ ба таври озмоишӣ дар 140 мактаб аз ҷараён дорад ва баъди татбиқи муваффақи он дар тамоми мактабҳо ҷорӣ карда мешавад.
“Низоми 10-холаи баҳогузорӣ баъди омӯзишу таҳлил ва баррасии коршиносон барои маорифи миллӣ муайян карда шуд, ки метавонад ба ҳама амалҳои муҳассилин баҳогузорӣ карда шавад”, – гуфтааст Саидзода.
Ба таъкиди ӯ, ин низоми баҳогузорӣ бо мақсади баланд бардоштани сифати таҳсилот, сатҳи дониш, малака ва маҳорати амалии хонандагон, ворид шудан ба фазои ягонаи таҳсилоти ҷаҳонӣ, муайян намудани сатҳи воқеии дониши хонандагон, ҳавасмандгардонӣ ва омода намудани онҳо дар зинаҳои минбаъдаи таҳсил, баҳогузории воқеӣ ба дониш, малака ва маҳорати хонандагон ҷорӣ карда мешавад.
Тибқи низоми нав баҳоргузорӣ чӣ гуна мешавад?
Мувофиқи низоми нав, баҳогузорӣ тариқи зайл сурат мегирад:
10-9 балл – "аъло";
8-6 балл – "хуб";
5-3 балл– "қаноатбахш";
2 ва 1 балл – "ғайриқаноатбахш".
Бояд гуфт, ки баҳси татбиқи низоми баҳогузории 10-хола дар Тоҷикистон чанд сол аст идома дорад. Қисме, махсусан мақомот онро дуруст ва саривақтӣ шуморида, барои ин далелҳо ҳам доранд. Вале бархеи дигар, аз ҷумла омӯзгорони собиқадор ва коршиносони соҳа ин тасмимро кори нодуруст ва сарфаи вақт медонанд.
