Доналд Трамп, раисҷумҳури Амрико бори дигар аз Владимир Путин, раисҷумҳури Русия изҳори ноумедӣ кард ва гуфт, ки поён додан ба ҷанги Русия дар Украин аз он чӣ дар аввал фикр мекард, мушкилтар баромад.
Ӯ ин нуктаро рӯзи 18-уми сентябр пас аз дидор бо Кир Стармер, нахуствазири Бритониё ба хабарнигорон зикр кард.
“Фикр мекардам, ба хотири робитаам бо Путин ин мавзуъ (хатми ҷанг дар Украина) осонтарин кор бошад. Аммо ӯ маро ноумед кард. Ӯ маро воқеан ноумед кард”, – гуфтааст раисҷумҳури Иёлоти Муттаҳида.
Ӯ дар идома гуфтааст, “умедворам, ки мо ба зудӣ дар ин бора хабари хуше хоҳем дошт". Аммо тафсилоти дигаре дар бораи ин хабар надодааст.
Русия ба ин гуфтаҳои раисҷумҳури Амрико то кунун вокунише нишон надодааст.
Дар мулоқоти Трамп бо Стармер, ки дар доираи сафари раисҷумҳури Амрико ба Бритониё сурат гирифт, яке аз масъалаҳои асосие, ки баррасӣ гардидааст, роҳҳои поён додан ба ҷанг дар Украина будааст. Ба гуфтаи нахуствазири Бритониё, онҳо дар бораи афзоиши фишор болои раисиҷумҳури Русия ба хотири қабул кардани сулҳ гуфтугӯ кардаанд.
Дар посух ба саволи хабарнигорон дар бораи ҷорӣ шудани таҳримҳои нав алайҳи Русия Трамп ва Стармер посухи мушаххас надодаанд. Доналд Трамп аз оғози давраи раёсатҷумҳурияш то ҳол алайҳи Маскав таҳримҳои нав ҷорӣ накардааст, ҳарчанд борҳо ваъда дода буд, ки агар Русия омодагии худ ба сулҳро нишон надиҳад, ин корро анҷом медиҳад.
Доналд Трамп баъди дубора нишастан ба курсии роҳбари Амрико ваъда карда буд, ки дар ду ҳафта ҷанги Русия дар Украинаро хотима медиҳад. Вале бо гузашти беш аз 6 моҳ, бо вуҷуди мулоқоти телефонӣ ва вохӯрӣ бо Владимир Путин ӯ ба ин кор муваффақ нашудааст.
