Дирӯз, 30-юми сентябр Эмомалӣ Раҳмон, раисҷумҳури Тоҷикистон дар доираи сафари кории худ ба ноҳияи Файзобод чанд иншооти навро ифтитоҳ кард.
Нахуст, раисҷумҳур дар ин ноҳия аз намоиши маҳсулоти кишоварзӣ боздид кардааст. Ба иттилои расмӣ, соли ҷорӣ кишоварзони ноҳияи Файзобод майдони кишти зироатҳои кишоварзиро ба 10 ҳазору 214 гектар расонидаанд.
“Бартарӣ ба зиёд намудани масоҳати кишти ғалладонагӣ, лубиёгиҳо, зироатҳои техникӣ, картошка, сабзавот ва полезӣ, ки иқлими ноҳия барои кишту парвариши онҳо бештар мусоид мебошад, дода шудааст, – гуфта мешавад дар хабари расмӣ.
Дар идома, Эмомалӣ Раҳмон майдони Парчами давлатиро дар ин ноҳия ифтитоҳ кардааст, ки дар он дар баландии 55 метр барафрохта шуд. Дарозии матоъи парчам 14 ва паҳноиаш 7 метрро ташкил медиҳад.
Ҳамчунин, дар ин майдон раисҷумҳур аз руйи пайкараи Исмоили Сомонӣ пардабардорӣ кард. Баландии ин муҷассама 7 метр ва зерпояи он 5 метрро ташкил медиҳад.
Дар идома раисиҷумҳур бинои нави Ҳизби Халқии Демократии Тоҷикистон ва шӯъбаи нави маорифи ноҳияро ифтитоҳ намудааст.
Бинои нави ҳизб се ошёнагӣ буда дар масоҳати 375 метри мураббаъ бунёд шудааст. Он дорои 6 ҳуҷраи корӣ, бойгонӣ ва маҷлисгоҳ будааст.
Бинои шӯъбаи маориф дар се ошёна бунёд шуда, дорои 15 утоқи корӣ ва маҷлисгоҳ мебошад.
Эмомалӣ Раҳмон ҳамчунин бо лоиҳаи банақшагирии ҷамоати шаҳраки Вашгирд шинос шудааст. Тибқи иттилои расмӣ шаҳраки нав дар масоҳати 163 гектар замин бунёд шуда, барои зиндагии 90 ҳазор кас пешбинӣ шудааст.
Тибқи лоиҳа бунёди биноҳои баландошёнаи истиқоматӣ, 5 мактаб, 3 кӯдакистон ва биноҳои маъмурии мақомоти давлатӣ ба нақша гирифта шудааст.
Сипас раисҷумҳур барои бунёди мактаб барои 1280 хонанда дар ду баст ва кӯдакистон барои 240 кӯдак дар деҳаи Шерамон санги асос гузоштааст.
Бо иштироки Эмомалӣ Раҳмон дар ноҳияи Файзобод бинои нави Маркази ташхису табобат ба истифода дода шудааст.
Тибқи иттилои расмӣ, бинои асосӣ дар масоҳати 3 375 метри мураббаъ дар се ошёна бунёд шудааст. Он дорои 214 ҳуҷра барои беморон бо 226 кат будааст.
Дар ин марказ, шуъбаҳои қабул ва ташхис, ёрии таъҷилӣ, ҷарроҳӣ, таваллудхона, шуъбаи табобати интенсивӣ барои кӯдакону калонсолон мебошад.
Дар идома раисҷумҳур бинои нави Маркази саломатии деҳаи Сафедхоки ноҳияи мазкурро ба таври фосилавӣ ифтитоҳ кардааст. Гуфта мешавад, ки бинои нави табобатӣ аз ҳисоби буҷети давлатӣ дар масоҳати 760 метри мураббаъ сохта шудааст.
Бино аз дуошёна иборат буда, дорои 14 ҳуҷраи корӣ ва 8 кати хоб аст. Дар ин марказ 12 мутахассиси маҳалӣ бо кор таъмин шудаанд.
Эмомалӣ Раҳмон дар интиҳои сафари корӣ дар ноҳияи Файзобод аз қитъаи замини помидори хоҷагии деҳқонии Чаноро ва боғи хоҷагии деҳқонии Солеҳҷон боздид кардааст.
Тибқи иттилои расмӣ майдони умумии хоҷагии деҳқонии Чаноро 611 гектар буда, дар 4 гектари он помидор парвариш карда мешавад. Хоҷагии деҳқонии Солеҳҷон дар масоҳати 1 гектар замин ташкил шудааст, ки дар он навъҳои гуногуни драхтони мева шинонида шудаанд.
