Имрӯз, 30-юми октябр, дар Душанбе Конфронси миллии ҷавонон оид ба иқлим (LCOY) оғоз ёфт. Дар конфронс бештар аз 100 ҷавони касбу кори гуногун аз саросари Тоҷикистон ҷамъ омада, пешниҳоди худро барои ҳалли таъсири манфии тағйирёбии иқлим таҳия мекунанд, ки дар ниҳоят чун “Изҳороти миллии ҷавонон” ба ҳукумати кишвар ва Конфронси СММ оид ба тағйирёбии иқлим (СОР UNFCCC) фиристода мешавад.
Дар чорабинии мазкур Парвати Рамасвами, ҳамоҳангсози СММ дар Тоҷикистон ва масъулини Кумитаи кор бо ҷавонон иштирок доштанд. Мутахассисони самти иқлим дар бораи вазъи тағйирёбии иқлим ва тасъсири он ба Тоҷикистон рӯнамоӣ карданд.
Орзу Одинаев, мушовири ЮНИСЕФ дар рӯнамоӣ худ гуфт, ки дар Тоҷикистон 2,5 млн кӯдакии то 18-сола ба гармои шадиди имрӯза осепазир ҳастанд. Маҳз барои ҳамин кор бо ҷавонон ва кӯдакон дар самти тағйирёбии иқлим муҳим аст.
ИЗОБРАЖЕНИЕ
Зимни ин чорабинӣ ҷавонони тоҷик якҷо бо мутахассисон дар 10 самти марбут ба иқлим пешниҳод ва ғояҳои худро барои кам кардани таъсири тағйирёбии иқлим барасӣ мекунанд.
Конфронс ду рӯз давом мекунад ва дар рӯзи дуюм “Изҳорои миллии ҷавонон” бо роҳи овоздиҳӣ қабул гардида, ба мақомоти дахлдор ва Конфронси СММ оид ба тағйирёбии иқлим (СОР UNFCCC) фиристода мешавад.
ИЗОБРАЖЕНИЕ
Дар доираи ин конфронс рӯзи 31-уми октябр дар боғи меҳмонхонаи “Серена-Душанбе” “Намоишгоҳи сабз” баргузор мегардад, ки дар он ширкатҳои тиҷоратӣ, иттиҳодияҳои ҷамъиятӣ ва фаъолони ҷамъиятӣ ташаббусҳои “сабз”, маҳсулотҳои экологӣ, лоиҳаҳои иқлимӣ ва имконоти корӣ ва таҳсил барои ҷавононро дар ин самт муаррифӣ мекунанд.
Намоиш аз соати 9:00 то 17:00 давом карда, даромад озод аст.
Конфронси СММ оид ба тағйирёбии иқлим (СОР UNFCCC) моҳи ноябри соли 2025 дар Бразилия баргузор мешавад.
