Қитъаи роҳи мошингарди баҳсии Исфара – Чоркуҳ – Ворух, ки дар пайи муноқишаҳои марзӣ бо Қирғизистон чанд сол боз баста буд ва баъди музокирот ба ҷониби Тоҷикистон гузашт, дубора боз шудааст. Дар ин бора хадамоти матбуотии раиси вилояти Суғд хабар медиҳад.
Манбаъ мегӯяд, роҳ бо ширкати Раҷаб Аҳмадзода, раиси вилояти Суғди Тоҷикистон ва Айбек Шаменов, раиси вилояти Ботканди Қирғизистон боз шудааст. Рӯзи бозкушоии роҳ маълум нест.
“Қаблан бинобар баста будани ин қитъаи роҳ сокинони деҳоти Ворух ва Чоркуҳ тавассути деҳаи Чорбоғ ба самти шаҳри Исфара ҳаракат мекарданд. Акнун, бо боз шудани роҳ масофа тақрибан як километр кӯтоҳ гардида, рафтуомади сокинон осонтар шуд”, – навиштааст манбаъ.
Мувофиқи Созишнома байни Тоҷикистону Қирғизистон оид ба сарҳади давлатӣ, ки аввали соли равон ба имзо расид, 65 га замини Қарабоқи Қирғизистон ба Тоҷикистон дода шудааст, ки ин қитъаи роҳи баҳсӣ низ дар он ҷойгир аст.
Боз кадом минтақаҳоро дар кадом навҳоӣ иваз карданд, дар ин мавод хонед: “Созишнома оид ба сарҳади давлатӣ. Тоҷикистон ва Қирғизистон кадом қитъаҳоро иваз карданд?”
Ҳамчунин, Қамчибек Тошиев, раиси Кумитаи давлатии амнияти миллии Қирғизистон (КДАМ) зимни муаррифии созишномаи муайян кардани марз бо Тоҷикистон ба Жогорку Кенеш (парламенти Қирғизистон) гуфт, ҷонибҳо ба мувофиқа расидаанд, ки роҳ то Ворухи Тоҷикистон ва то Саркандаки Қирғизистон мақоми бетераф мегирад.
“Тарафҳо ба мувофиқа расиданд, ки роҳҳои Хоҷаӣ-Аъло – Дача – Қапчиғай – Ворух бо дарозии 3425 метр ва паҳноии 40 метр ва Мин-Орук – Самарқандак – Ориёна – Шуристон бо дарозии 3241 метр ва паҳноии 40 метр бо мақоми бетараф бунёд ва истифода шаванд", – гуфта буд Ташиев.
Ӯ ҳамчунин тавзеҳ дода буд, ки роҳи Ворухро ҷониби Тоҷикистон ва роҳи Самарқандакро ҷониби Қирғизистон месозад. Дигар ҷузъиёти созишнома дар бораи роҳи Ворух маълум нест, вале эҳтимол сухан дар бораи роҳе меравад, ки аз деҳаи қирғизии Қапчиғай (Танги) давр зада мегузарад.
Ҷониби Тоҷикистон то имрӯз ҷузъиёти созишнома, аз ҷумла ивази қитъаҳо ва мақоми роҳҳоро шарҳ надодааст, аммо изҳороти ҷониби дигарро рад ҳам накардааст.
