Кумитаи ҳолатҳои фавқулоди Тоҷикистон (КҲФ) дар шарҳи заминларзаи шаби гузашта гуфт, ки дар пайи он хисорот ва талафоти ҷонӣ ба қайд гирифта нашудааст.
Бар асоси маълумоти Хадамоти геофизикии Академияи миллии илмҳои кишвар, заминларза дар Тоҷикистон соати 01:29-и рӯзи 3-юми ноябр (ба вақти Душанбе) сабт шудааст. Қувваи заминларза дар марказаш (Афғонистон) 6-7 балл, дар шаҳри Душанбе 4 балл ва дар шаҳри Панҷакент 3 баллро ташкил додааст.
КҲФ мегӯяд, маркази заминҷунбӣ дар 236-километрии ҷанубу-ғарбии шаҳри Душанбе, 80-километрии ҷанубу-ғарбии ноҳияи Шаҳритӯси вилояти Хатлон ва 322-километрии шаҳри Панҷакенти вилояти Суғд дар ҳудуди Афғонистон буд.
Бояд гуфт, шаби гузашта – 2-3-юми ноябри соли равон сокинони Тоҷикистон заминларзаи сахтро эҳсос карда, бархеҳо дар Душанбе аз тарс ба кӯчаҳо баромадаанд.
Ин заминларза дар Ӯзбекистон, Туркманистон ва Покистон ҳам эҳсос шудааст. Дар пайи ин ҳодиса, дар Афғонистон беш аз 20 тан ҷон бохта, наздики 200 каси дигар маҷруҳ шудаанд.
Ҳамасола дар Тоҷикистон даҳҳо заминларза рух медиҳад, ки бархеи онҳо хисорот ҳам дар пай доранд. Аз ҷумла, бар асари заминларзаи рӯзи 13-уми апрели соли равон дар ноҳияҳои Рашт ва Тоҷикобод 67 манзили истиқоматӣ пурра ва 280 хона қисман вайрон шуда буданд. Ҳамчунин, 146 бинои ёрирасон, аз қабили мактаб, бунгоҳи тиббӣ, хатҳои интиқоли барқ, роҳҳо ва системаҳои обтаъминкунӣ зарар дида, 57 сар чорво талаф ёфтааст.
КҲФ гуфта буд, ки зарари ин заминҷунбӣ дар маҷмӯъ, беш аз 17,78 миллион сомонӣ ($1,66 млн) ҳисоб шуда, 5639 нафар зарар дида буданд.
