Дар ҷараёни амалиёти “Нелегал-2025” аз моҳи июн то октябри соли 2025 дар Русия мақомоти ин кишвар зиёда аз 19 ҳазор шаҳрвандони хориҷиро, ки ғайриқонунӣ дар қаламрави ин кишвар ҳузур доштанд, ихроҷ кардаанд. Дар ин бора намояндаи расмии ВКД Русия Ирина Волк дар шабакаи Telegram-и худ иттилоъ додааст.
Ба гуфтаи ӯ, дар ин давра зиёда аз 128 ҳазор қонуншиканӣ дар соҳаи муҳоҷират ошкор шудааст. Аз ин миқдор ҳудуди 100 ҳазор ба қоидаҳои вуруд ва хуруҷ, тариқи транзит гузаштан ва будубош, боз 28 ҳазор – ба қонуншиканиҳо дар доираи фаъолияти кории шаҳрвандони хориҷӣ марбутанд.
Дар доираи амалиёт ҳудуди 4,8 ҳазор парвандаи ҷиноятӣ вобаста ба ташкили муҳоҷирати ғайриқонунӣ ва ҳудуди 1,5 ҳазор парвандаи марбут ба дигар таркибҳои ҷиноят – бо шумули гардиши ғапйриқонунии маводи нашъаовар ва силоҳ, убури ғайриқонунии сарҳад, инчунин ҷиноятҳои дорои хусусияти террористӣ ва ифротгароӣ оғоз гардидааст.
Намояндаи расмии ВКД Русия гуфтааст, ғайр аз ин, мақомоти ҳифзи ҳуқуқ 673 нафари мавриди пайгарди федералӣ, 329 нафари мавриди ҷустуҷӯи байнидавлатӣ ва 37 нафари мавриди пайгарди байнулмилалӣ қарордоштаро ошкор кардаанд.
Ёдрас мекунем, ки дар фурудгоҳҳои бузурги Русия бори нахуст 12 нуқтаи назорати муҳоҷирон ба кор оғоз кард. Нуқтаҳо дар фурудгоҳҳои Маскав, Санкт-Петербург, Сочи, Қазон, Новосибирск, Красноярск, Екатеринбург ва дигар шаҳрҳои бузург боз шуданд.
Ҳадафи аслии кори ин нуқтаҳо ошкор кардани шаҳрвандони хориҷиест, ки қонунгузории муҳоҷиратро риоя намекунанд.
