Як гург ба ду чӯпони маҳаллӣ дар ноҳияи Деваштич ҳамла карда, онҳоро захмӣ кардааст. Онҳо дар Беморхонаи марказии ноҳия бистарӣ мебошанд. Ҳодиса 28-уми ноябр дар саҳро рӯх дода, захмиён Айниддин Тоҷибоев ва Хурсандмурод Олимов, сокинони деҳаи Қалъаи дӯсти ҷамоати деҳоти Ваҳдат мебошанд.
“Хостам гургро аз наздик бинам”
Айниддин Тоҷибоев, яке аз ҷабрдидаҳо дар суҳбат бо “Азия-Плюс” гуфт, ҳангоми чаронидани гусфандон дар саҳро гургро дида, ба сӯи ӯ рафт.
“Ҳисси кунҷковиям боло гирифту тарафи гург рафтам то аз наздик бубинам. Нишаста ба гург нигоҳ мекардам, ки якбора гург ҳамла кард. Аз тарс бо коррди дастам, ба бадани гург чанд корд задам”, – нақл кард ӯ.
Ба гуфтаи Тоҷибоев, дар ин ҳолат шарикаш Хурсандмурод Олимов ба кӯмак шитофт, аммо гург ӯро низ захмӣ кард.
Бо вуҷуди захмӣ шудан, онҳо бо истифода аз корд ва асои чупонӣ гургро куштаанд.
Айниддин Тоҷибоев мегӯяд, давоми 10 соли чӯпонӣ бори аввал бо гург рӯ ба рӯ шудааст.
Солеҳ Авзалзода, мудири шӯъбаи ҷарроҳии Беморхонаи марказии ноҳияи Деваштич ба “Азия-Плюс” гуфт, Айниддин Тоҷибоев ва Хурсандмурод Олимов бо ҷароҳатҳои вазнин дар рӯй, пешонӣ ва даст дар беморхона бистарӣ шуданд.
“Вазъи саломатии Айниддин Тоҷибоев вазнинтар буд ва ӯро дар шуъбаи эҳёгарӣ ҷо кардем. Ҳарду дар як вақт муроҷиат карданд ва осори захми дарранда ҷой дошт”, – гуфт ӯ.
Табиб зикр кард, ки ба беморон сӯзандору ва мояи зиддиҳорӣ гузаронида шудааст ва давоми се рӯзи табобат беҳбудӣ дида мешавад.
Ин ҳодисаи дуюми ҳамлаи гург ба сокинон ва чорвои онҳо дар даҳаи охири моҳи ноябр дар ноҳияи Деваштич аст. Рӯзи 22-юми ноябр гург беш аз 10 чорвои сокинони деҳаи Басмандаро кушта, чанд чорвои дигарро захмӣ карда буд.
Бори аввал нест, ки дар Тоҷикистон ҳамлаи ҳайвоноти ваҳшӣ ба аҳолӣ ба қайд гирифта мешавад. Ҳамасола аз ҳамлаи хирсу гург даҳҳо нафар захмӣ ва ё кушта мешаванд. Аз ҷумла, соли 2019 ду зан дар ноҳияи Шуғнон дар пайи ҳамлаи гурон кушта шуда буданд.
Ҳайвоноти ваҳшӣ, ҳамчунин, ба сокинони минтақҳои кӯҳии кишвар низ ҳамла карда, онҳоро захмӣ ва гоҳо ба ҳалокат расонида буданд.
