Як зодаи Тоҷикистон баъди ибрози андешаҳояш дар бораи куштори Қобилҷон Алиев, навраси 10-солаи тоҷик дар мактабе дар канори Маскав боздошт шудааст. Дар ин бора Маркази ҳомии ҳуқуқи “Сова” дар Русия хабар дода, аз ин ҷавон Саидназар Ҳоҷимуродов ном бурдааст.
Манбаъ гуфтааст, ӯ рӯзи 19-уми декабр дастгир шуда, алайҳаш барои "барангехтани кинаву адовати миллӣ" парвандаи ҷиноӣ боз шудааст.
Ин ҷавони 25-солаи тоҷик, ки дар Маскав кироякашӣ мекард, дар наворе ҳукумати Русия ва Александр Бастрикин, раиси Кумитаи тафтишоти ин кишварро бо лаҳни тунд ва олуда бо дашном “барои беэътиборӣ ба ҷиноятҳои дар заминаи бегонаситезӣ рухдода” интиқод кардааст.
Ӯ аз ҷумла гуфтааст, “агар аз ҷониби ягон тоҷик ё зодаи Тоҷикистон нафаре инҷо (дар Русия) кушта шавад, расонаҳо ба миллати ӯ ишора мекарданд”. Ҳоҷимуродов инро “ноодилона” хонда, таъкид кардааст, ки “тоҷикон дар Русия пайваста кушта мешаванд, аммо ҷомеа бетараф боқӣ мемонад”.
Ба навиштаи “Сова” наворҳои ин кироякашро саҳифаи тундрави “Многонационал” дар “Телеграм” нашр карда, боздошти ӯро талаб кардааст.
Вале ба гуфтаи ин марказ, "дар баёнияҳои эҳсосии Саидназар Ҳоҷимуродов аломати барангехтани адовати милливу динӣ дида мешавад, вале тарғиб ё сафед кардани зӯроварӣ дида намешавад, аз ин рӯ, ягон асос барои боз шудани парванди ҷиноӣ бо банди "б"-и қисми 1-и моддаи 282-и Кодекси ҷиноятӣ (Барангехтани нафрат ё душманӣ, инчунин паст задани шаъну шарафи инсонӣ) вуҷуд надорад”.
“Хоҷимуродов қаблан бо моддаҳои "зиддиэкстремизм" ба ҷавобгарӣ кашида нашудааст. Аз ин рӯ, мақомоти ҳифзи ҳуқуқ бояд танҳо бо оғоз кардани парвандаи ҳуқуқвайронкунии маъмурӣ тибқи моддаи 20.3.1-и Кодекси ҳуқуқвайронкунии маъмурии Русия (Барангехтани нафрат ё душманӣ, инчунин паст задани шаъну шарафи инсонӣ) маҳдуд мешуданд", – гуфтааст ин марказ.
Мақомоти Русия ин қазияро расман шарҳ надодаанд.
Ёдовар мешавем, ки 16-уми декабр дар мактабе дар вилояти Маскав дар пайи ҳамлаи як шаҳрванди 15-солаи Русия дар пояи “нафрати миллӣ” Қобилҷон Алиеви 10-сола кушта шуд. Ӯро рӯзи 18-уми декабр дар ноҳияи Шаҳринав ба хок супориданд ва муттаҳам ба куштори ӯ ду моҳ ба ҳабси пешакӣ гирифта шуд.
Ин қазия вокуниши зиёдеро дар саросари Тоҷикистон ва берун аз он ба миён овард. Ҷомеа на танҳо муҷозоти қотили Қобилҷонро мехоҳад, балки ба ташхису маҳкум кардани омили аслии ин ҷинояти мудҳиш – миллатгароӣ ва муҳоҷирситезӣ дар Русия таъкид мекунад.
Эмомалӣ Раҳмон, раисҷумҳури Тоҷикистон низ рӯзи 22-юми декабр дар дидори худ бо Владимир Путин таҳқиқи қазияро пеш гузошт ва раисҷумҳури Русия ваъда дод, ки “гунаҳкорон ҷазо хоҳанд гирифт”.
