Доналд Трамп, раисҷумҳури Амрико эълом кард, ки музокирот бо Владимир Зеленский, ҳамтои украиниаш барои хотима додан ба ҷанг дар Украина пешрафт доштааст, аммо “як ё ду масъалаи ҳассос ва муҳим" – бахусус мавзуи қаламравҳои ин кишвар, ҳанӯз ҳал нашудаанд.
Дар ҳамин ҳол, сарони Амрико ва Украин гуфтаанд, дар мулоқоташон дар иёлати Флорида, ки ба вақти маҳаллӣ, рӯзи якшанбе доир шуда, ҳудуди 3 соат давом ёфт, ба пешрафтҳои назаррасе даст ёфтаанд.
Зеленский изҳор дошт, ки баъзе аз бахшҳои тарҳи 20-бандии сулҳ "90 дарсад" ниҳоӣ шудаанд ва замонатҳои амниятии Амрико барои Украина пурра мувофиқа гардидаанд, аммо Трамп ин рақамро "наздик ба 95 дарсад" арзёбӣ кард.
Трамп гуфт, гуфтугӯҳо ҳамчунон “бисёр печидаанд”, аммо аз ироаи мӯҳлати дақиқ барои поёни ҷанг худдорӣ кард. Дар ҳамин ҳол раисҷумҳури Амрико гуфт, “фикр мекунам, дар зарфи чанд ҳафта мо ба як натиҷа мерасем. Ба як самт ё самти дигар”.
Яке аз масъалаҳои асосии ҳалнашуда, ба гуфтаи Трамп, мавзуи қаламрав, ба хусус назорат кардан ба минтақаи Донбасс аст. Ҳоло, ба навиштаи расонаҳо, қисматҳои Донбасс, ки Русия онҳоро назорат мекунад, тақрибан 75%-и Донетск ва 99%-и Луҳанскро дар бар мегиранд.
.jpg)
ИЗОБРАЖЕНИЕ
Зеленский бори дигар ба мавқеи доимии худ дар ин масъала таъкид кард ва гуфт, “мо бояд ба қонун ва мардумамон эҳтиром гузорем”.
Қонуни асосии Украина иҷозат намедиҳад, ки ин кишвар қаламрави худро тавассути овоздиҳии парлумонӣ сарфи назар кунад. Тасмим дар бораи вогузории сарзамин бояд тавассути ҳамапурсӣ ва овоздиҳии мардум тасдиқ карда шавад.
Трамп ҳамчунин, аз эҳтимоли мулоқоти ояндаи Владимир Зеленский ва Владимир Путин дар “вақти муносиб” сухан гуфта, таъкид кардааст, ки ҳарду президент ба хотима додан ба ҷанг тамоюл доранд.
Ӯ эҳтимоли пайдо шудани мушкилоти ғайричашмдоштро дар раванди баррасии сулҳ истисно накард ва афзуд, ки ҳар нукта дар нақшаи сулҳ "метавонад хеле муҳим бошад" ва тамоми созишномаро халалдор кунад.
Ба гуфтаи Трамп, баъди мулоқот бо Зеленский, бо чанд роҳбари кишварҳои аврупоӣ, аз ҷумла Фаронса, Норвегия, Италия, Бритониё ва Олмон, низ суҳбатҳои телефонӣ анҷом додааст.
Пас аз ин суҳбат, Урсула фон дер Лейен, раиси Комиссияи Аврупо дар саҳифаи худ дар шабакаҳои иҷтимоӣ “X” (“Твитер”-и пешин) навишт, ки “Аврупо омода аст, ки бо Украина ва шарикони амрикоии худ барои тақвияти пешрафт (дар гуфтушунидҳо ба даст омада) ҳамкорӣ кунад. Дар маркази ин талошҳо бояд таъмини кафолатҳои амниятии қавӣ бошад".
Сухангӯи сарвазири Бритониё Кир Стармер, ки низ дар ин мулоқоти маҷозӣ ҳузур дошт, гуфтааст, ҳам Стармер ва ҳам роҳбарони аврупоӣ "аҳамияти кафолатҳои амниятии қатъӣ ва зарурати ҳарҷӣ зудтар хотима додан ба ин ҷанги ваҳшиёнаро таъкид карданд".
Русия то ҳол дар робита ба ин мулоқот вокуниш накардааст. Танҳо Кирилл Дмитриев, фиристодаи махсуси президенти ин кишвар дар шабакаи “X” аз Доналд Трамп изҳори сипос кард ва илова кард, ки “тамоми ҷаҳон талошҳои сулҳҷӯёнаи президент Трамп ва дастаи ӯро қадр мекунад".
Мулоқоти Трамп ва Зеленский дар Мар-а-Лаго, қароргоҳи шахсии Доналд Трамп дар иёлати Флорида баргузор шуд.
Пеш аз шуруъи мулоқоти Зеленский ва Трамп, раисҷумҳури Амрико ба хабарнигорон гуфт, ки фикр мекунад раисҷумҳурҳои Украина ва Русия “ҳарду мехоҳанд ба созиш расанд”. Ба андешаи Трамп, Владимир Путин, ҳамтои руси ӯ барои сулҳ бо Украина “ҷиддӣ аст”.
Зеленский гуфта буд, ки ин "яке аз муаасиртарин рӯзҳои дипломатии сол" хоҳад буд ва "бисёр чизҳо" метавонанд дар соли 2025 ҳал шаванд.
Соате пеш аз ин, Трамп эълон кард, ки бо Путин суҳбати телефонии “бисёр созанда”-е доштааст.
Юрий Ушаков, ёвари раисҷумҳури Русия гуфта буд, Путин дар суҳбат бо Трамп изҳор дошт, ки ба оташбаси муваққатӣ розӣ нест ва ин "танҳо боиси тӯлонитар шудани ҷанг мешавад”. Ба гуфтаи ӯ, раисҷумҳури Амрико ҳам ба ин дидгоҳ розӣ аст.
Қарор аст пас анҷоми дидори Трамп бо Зеленский, раисҷумҳурҳои Амрико ва Русия дигарбора тамос гиранд.
Ёдовар мешавем, ки Амрико тарҳеро барои поён додани ҷанг дар Украина таҳия карда буд. Қаблан ин тарҳро Доналд Трамп ва Владимир Зеленский дар Кохи Сафед ва Владимир Путин ва Стив Виткофф, фиристодаи вижаи ИМА дар Кремл баррасӣ карда буданд.
