Созмони байналмилалии муҳоҷират (СБМ) ба сокинони Тоҷикистон ҳушдор дод, ки ба ҳамаи эълонҳои кор дар Британия бовар накунанд.
Намояндагии ин ниҳод дар Душанбе рӯзи 9-уми январ дар иттилоияе гуфтааст, шаҳрвандон ба даъвату пешниҳоди кор, ки тариқи паёмрасони “WhatsApp” ё “Telegram” фиристода мешаванд, бовар накунанд. Зеро, ба гуфтаи манбаъ, “корфармоёни воқеӣ ҳеҷ гоҳ барои муошират аз паёмрасонҳо истифода намебаранд”.
“Ҳамчунин, ба таблиғҳо дар шабакаҳҳои иҷтимоӣ бовар накунед, аксари ин эълонҳо метавонанд бардурӯғ бошанд. Ҳар иттилоъро ҳатман дубора санҷед. Барои шаҳрвандони Тоҷикистон дар Британияи Кабир ба ҷуз аз “Барномаи коргарони мавсимӣ” дигар имкони кор вуҷуд надорад”, – навиштааст Намояндагии СБМ дар Тоҷикистон.
Ин ниҳод илова кардааст, ки “агар мехоҳед, барои кори мавсимӣ ба Британия Кабир равед, танҳо дар сомонаҳои расмии ширкатҳо сабтином кунед. Бо ин роҳ шумо метавонед аз қаллобон канорагирӣ ва манфиатҳои худро ҳифз кунед”.
Рӯйхати корфармоёни дорои иҷозатнома, ки Намояндагии СБМ нашр кардааст:
🔹 Agri-HR – https://www.agri-hr.com/
🔹 Concordia – www.concordia.org.uk
🔹 Fruitfuljobs – www.fruitfuljobs.com⠀
🔹 Hops – www.hopslaboursolutions.com
🔹 Pro Force – www.pro-force.co.uk
Барои маълумоти бештар бо рақамҳои 900 800 800 ба ниҳоди мазкур дар тамос шуда метавонед.
Бояд гуфт, пас аз эҷоди монеаҳои зиёд барои кор ва муносибати хашини мақомот дар Русия, ки самти аслии муҳоҷират барои шаҳрвандони Тоҷикистон аст, сокинони барои муҳоҷирати корӣ ба кишварҳои ғарбӣ, аз ҷумла Британияи Кабир таваҷҷуҳи бештар доранд.
Аммо сафар ба ин кишварҳо, ки ҳақи бештар барои кор пардохт мекунанд, барои ҳама дастрас нест ва танҳо тавассути имтиҳону номнависи пешакӣ фиристода мешаванд. Аз ин лиҳоз, сокинон барои гузаштан аз имтиҳон ва номнавис, ба миёнаравҳо пул медиҳанд ва дар аксар ҳолат, фиреб мехуранд.
