Дар соли 2025 истеҳсоли пахта ва содироти ашёи хом дар Тоҷикистон зиёд шуда, лекин содироти маҳсулоти тайёр аз пахта кам шудааст. Дар ин давра, мисли пешин, ба кишварҳои хориҷӣ асосан ашёи хом фурӯхта шуда, аммо коркарди пахта дар дохили ҷумҳурӣ ҳанӯз ҳам маҳдуд ва нокофӣ боқӣ мемонад.
Аз рӯйи натиҷаҳои соли 2025 дар Тоҷикистон 392,2 ҳазор тонна пахта истеҳсол шудааст, ки аз нишондиҳандаҳои нақшавӣ каме зиёдтар аст.
Дар муқоиса бо соли 2024 ҳаҷми истеҳсол ба миқдори 139,5 ҳазор тонна афзудааст. Дар ин бора Вазорати кишоварзии ҷумҳурӣ хабар медиҳад.
Содироти нахи пахта аз пешгӯиҳо зиёдтар шуд. Давоми сол ба маблағи умумии 142,1 млн доллар ҳудуди 93 ҳазор тонна нахи пахта ба хориҷи кишвар интиқол ёфтааст. Ҳукумат содироти 71,1 ҳазор тоннаро ба маблағи 135 млн доллар дар нақша дошт.
Дар ҳамин ҳол, содироти ришта ё худ калобаи пахта аз сатҳи интизоридошта пасттар шуд. Дар амал ба маблағи 25,05 млн доллар 11,24 ҳазор тонна ришта содир шуда, тибқи пешгӯиҳо интиқоли ҳудуди 16 ҳазор тонна калоба ба хориҷи кишвар ба маблағи 56,1 млн доллар пешбинӣ шуда буд.
Камшавӣ ҳамчунин дар содироти матоъ ва маҳсулоти тайёри пахта низ ба қайд гирифта шудааст. Соли 2025 ҳаҷми содироти ин маҳсулот 3,25 ҳазор тонна ба маблағи 9,45 млн долларро ташкил додааст. Тибқи пешгӯиҳо бошад, бояд ба маблағи 17,6 млн доллар 5,8 ҳазор тонна аз ин навъи маҳсулот содир мешуд.
Ба сурати умум, натиҷаҳои соли 2025 нишон медиҳанд, ки дар баробари афзоиши истеҳсоли пахта ва зиёдшавии содироти ашёи хом, содироти маҳсулоти коркардшуда ҳоло ҳам кам аст.
