Пулиси Суғд мегӯяд, дар маркази дилхушии “Парламент”-и шаҳри Хуҷанд дар як ҳафтаи охири соли гузашта се муноқиша рух додааст.
Ин ниҳод дар як гузориши телевизионӣ ду ҳодисаро шарҳ дода, ҳодисаи сеюмро шарҳ надодааст. Маълум нест, ҳодисае, ки ҷузъиёташ эълон нашудааст, ба қазияи муноқиша миёни додситони ҳамакнун собиқи шаҳри Бӯстон, Абдуқаҳҳор Азизов ва роҳбари тарабхонаи “Парламент” Парвиз Ашӯров рабт дорад ё не.
Дар гузориши “Ахбори ВКД”, ки 23-юми январ нашр шудааст, гуфта мешавад, ки дар занозании якум, ки 30-юми декабр рух дод, чор нафар сокини шаҳри Хуҷанд – Шероз Ашуров, Абдулло Бобоҷонов, Акмал Кароматуллоев ва Аббос Авезов “аз ҳиссиёти авбошӣ” ҷанҷоли лафзӣ карда, баъдан миёни онҳо занозанӣ сурат гирифтааст.
Инчунин, гуфта мешавад, ки ҳодисаи дуввум, 31-юми декабр рух дода, ҷавонии Муҳаммад Сабурзодаи 22-сола бо як зан дар маркази дилхушӣ даргирӣ кардааст.
Маълум нест, ки алайҳи онҳо парванда боз шудааст ё не.
Мақомот ҳодисаи сеюмро, ки ба гуфтаи онҳо ҳудуди 10 рӯз пеш дар ин макон рух додааст, шарҳ надодаанд ва маълум нест, ки он ба қазияи муноқишаи Абдуқаҳҳор Азизов ва Парвиз Ашӯров рабт дорад ё не. Ин ҳодиса ҳам тақрибан да шубу рӯзи ҳодисаи сеюме, ки мақомот дар гузориш шарҳ надодаанд, рух дода буд.
Қаблан, Радиои Озодӣ навишта буд, кашокаш миёни Абдуқаҳҳор Азизов ва Парвиз Ашӯров охири моҳи декабр сар задааст. Муноқиша аз он шурӯъ шудааст, ки додситон, ки бо дӯстонаш дар тарабхона ҳузур доштааст, гӯё бо Парвиз Ашӯров ҷанҷол карда, ба сари ӯ даст бардоштааст. Дар ҷавоб гӯё Парвиз Ашӯров ва дигар пайвандонаш додситонро задаанд.
ИЗОБРАЖЕНИЕ Меҳмонхонаи "Парламент", ки дар дохили он тарабхонаи ҳамномаш ҷойгир аст.
“Барои ҷудо кардани ду тараф як корманди милиса, ки дар тарабхона будааст, ба ҳаво тир андохтааст. Гуфта мешавад, барои баррасии ҳодиса кормандони милиса низ ба онҷо рафтаанд”, – навиштааст ин расона.
Чанд рӯз пас аз ин ҳодиса бо фармони додситони кулл, Абдуқаҳҳор Азизов аз вазифа сабукдӯш ва ҳамин тариқ, аз ҳаққи кор дар идораҳои додситонӣ маҳрум шуд. Додситонии кул ҳам расман барканории Азизовро тадсиқ ё рад накардааст.
Мақомот ва ҳарду ҷониби қазия ҳам ҳодисаро то ҳол шарҳ надодаанд. Қаблан, хабарнигори "Азия-Плюс" ба ҷойи ҳодиса ба тарабхонаи “Парламент”, ки дар дохили меҳмонхонаи ҳамноми он ҷойгир аст, рафт, вале нигаҳбон гуфт, "роҳбарият пас аз Соли нав ба кор ҳозир нашудаанд ва бо ВАО ҳам сӯҳбат намекунанд”.
Дар шабакаҳои иҷтимоӣ наворҳои зиёде аз ин занозанӣ нашр шудааст, ки дар ҳар кадоми он ҷонибҳо тарафи дигареро сабаби сар задани муноқиша меноманд
Радиои Озодӣ ду рӯз пеш навишт, ки Додгоҳи шаҳри Хуҷанд баррасии парвандаи занозании дар ин тарабхонаро оғоз карда, чаҳор нафар дар додгоҳ муҳокима мешаванд. Ду нафар дар боздошт, ду тани дигар дар озодӣ будаанд.
Ба навиштаи манбаъ, Абдуқаҳҳор Азизов, писари Абдуҷаббор Азизов ёвари собиқи президенти Тоҷикистон дар масъалаи кадрҳо, муовини аввали раиси Ҳизби Халқии Демократии Тоҷикистон (ҲХДТ) ва Парвиз Ашӯров домоди собиқи Қоҳир Расулзода, сарвазири Тоҷикистон аст.
