Дар пайи ҳамлаи сагҳои оворагард ё дайду дар ноҳияи Рӯдакӣ Ҳаким Давлатови 12-сола, сокини деҳаи Мирзочули ин ноҳия ҷон бохтааст. Ҳодиса рӯзи 15-уми январи имсол рух дода, писарбача ҳудуди 8 соат баъди ҳамлаи сагҳо, дар беморхонаи “Шифобахш” (Қарияи Боло) ба ҳалокат расидааст.
Акси пайкари хунолуди ин наврас чанд рӯзи охир дар шабакаҳои иҷтимоӣ паҳн шуда, боиси нигаронии корбарон гардида буд. Дар акс дида мешавад, ки кӯдак бо захмҳои гуногун дар бемористон бистарӣ буда, табибон талош доранд ба ӯ кӯмак расонанд.
Иноятулло Юсупов, роҳбари Маркази таъмини бехатарии озуқаворӣ дар ноҳияи Рӯдакӣ имрӯз, 26-уми январ дар сӯҳбат ба “Азия-Плюс” ҳодисаро тасдиқ карда, гуфт, ки писарбачаро бегоҳии рӯзи 15-уми январ ба хок супурдаанд.
Номбурда афзуд, ки сагҳои дайду дар заминҳои кишти деҳа, ки “хеле дур аз хонаи ин кӯдак аст, ба ӯ ҳамла кардаанд”. Ба нақли ӯ, Ҳаким барои дидани ҳавзи моҳипарвариашон ба ин минтақа танҳо рафта буд.
“Ба нақли падари Ҳаким, сагҳои дайду ба ӯ захми шадид расонидаанд. Аз сабабе, ки дар наздики ҷойи ҳодиса манзили зист нест, ҳеҷ кас ба додаш нарасидааст. Дар роҳ ба беморхона, дар пайи изтиробу эҳсоси тарс сатҳи қанди писарбача 17,4 шудааст. Кӯдакро ҷарроҳӣ накардаанд, танҳо пайи газидагии сагро озмоиш карда диданд, ки сагҳои дайду бемории ҳорӣ (девонагӣ) надоштаанд”, – гуфт манбаъ.
Холназар Ғиёсов, муовини сардухтури беморхонаи “Шифобахш” дар сӯҳбати телефонӣ кӯтоҳ ба “Азия-Плюс” гуфт, ки “Ҳакимро дар вазъияти ниҳоят шадид ба беморхона оварданд”.
“Баъди нисфирӯзӣ ӯро оварданд, узвҳои ҳаётан муҳимаш зарар дида буд. Ниҳояти талошро кардем, аммо бегоҳии он рӯз фавтид”,-гуфт Ғиёсов.
Иноятулло Юсупов гуфт, ки дар пайи ин ҳодиса, дар ҳудуди ҷамоати Чоряккорони ноҳияи Рӯдакӣ, қариб 100 саги дайдуро “безарар карданд”.
Кӯшишҳои “Азия-Плюс” барои сӯҳбат бо Раҷабалӣ Давлатов, падари Ҳаким ва масъули ҳукумати ноҳияи Рӯдакӣ то замони нашри хабар бенатиҷа анҷомид.
Қаблан низ сагҳои оворагард ва бемории ҳоридошта ба сокинони деҳаҳои алоҳидаи Тоҷикистон ҳамла мекарданд, ки гоҳо он ба марги сокинон меанҷомид. Аз ҷумла, моҳи сентябри соли гузашта дар пайи ҳамлаи сагҳои дайду дар деҳаи Гулхании шаҳри Ҳисор 24 кас осеб дида, дар беморхона бистарӣ шуда буданд.
Дар пайи ин ҳодисаҳо, мақомот дар бештари ҳолатҳо, маъракаи безараргардонӣ ё куштори сагҳои дайдуро ба роҳ мемонанд.
