Дар Тоҷикистон қонуни нав “Дар бораи дастгирии содирот” мавриди таҳия қарор дорад, ки ба гуфтаи масъулин, "ба истеҳсолкунандагони ватанӣ ҷиҳати пешбурди фурӯши молу маҳсулот ва хидматрасонӣ дар хориҷи кишвар кумак мекунад". Дар ин бора Баҳриддин Сироҷиддинзода, директори Оҷонсии содироти Тоҷикистон зимни нишасти матбуотӣ хабар дод.
Ӯ гуфт, ки "ҳадафи аслии қабули қонун бунёди заминаи ҳуқуқӣ барои кумак аз ҷониби давлат ба содироти молу маҳсулот, кор ва хидматрасониҳо мебошад. Ҳамчунин, қонун ба баланд бардоштани рақобатпазирии маҳсулоти истеҳсоли Тоҷикистон дар бозорҳои байналмилалӣ нигаронида шудааст, ки ба ҷумҳурӣ барои таҳкими мавқеъ дар иқтисоди ҷаҳонӣ кумак мекунад".
Ба таъкиди номбурда, ғайр аз ин, он ба беҳтар шудани шароитҳо барои сармоягузорон ва рушди соҳаҳои иқтисоди марбут ба содирот мусоидат мекунад.
"Дар назар аст, ки ба туфайли ин иқдом Тоҷикистон дар тиҷорати байнулмилалӣ ба шарики боэътимод табдил меёбад. Бунёд ва рушди бозорҳои нав барои маҳсулоти истеҳсоли Тоҷикистон ва беҳтар сохтани зерсохтори нақлиёт ҷанбаи муҳим хоҳад шуд", – гуфт Баҳриддин Сироҷиддинзода.
Ҳамчунин, мустаҳкам намудани мавқеи Тоҷикистон дар бозорҳои аллакай мавҷудаи маъмулӣ ба нақша гирифта шудааст.
Сироҷиддинзода зикр кард, ки соли гузашта "Барномаи давлатии рушди содирот барои солҳои 2026-2030" қабул шуд, ки ҷиҳати ба таври назаррас беҳтар кардани шароитҳо баҳри рушд ва гуногунсамт сохтани содироти маҳсулот аз Тоҷикистон мусоидат менамояд.
“Ин иқдомҳо барои истеҳсолкунандагони ватанӣ дар бозорҳои ҷаҳонӣ имконоти нав муҳайё месозанд”, – илова намуд директори Агентӣ.
