Рӯйхати ниҳоии довталабон барои баргузории Ҷоми футболи Осиё-2031 маълум шуд. Тоҷикистон ҳамроҳи Ӯзбекистону Қирғизистон довталаби баргузории ин мусобиқа дар соли 2031 гардид.
Қабули дархостҳо пас аз ташаббуси Салмон бин Иброҳим ал-Халифа, президенти КФО, ки тасдиқи кишварҳои мизбони мусобиқаҳои соли 2031 ва 2035-ро дар доираи як конгрес дархост кард, оғоз шуда буд.
Қабули дархостҳо барои баргузории Ҷоми Осиё-2035 ҳам ба охир расид. Акнун КФО ба марҳилаи минбаъда – ҳамкорӣ бо федератсияҳои номзад ҷиҳати омодагии бастаи пурраи ҳуҷҷатҳо тибқи регламент ва муҳлат оғоз мекунад.
Тавре ки КФО хабар медиҳад, дар рӯйхати ниҳоии кишварҳои хоҳишманди қабули Ҷоми футболи Осиё-2031, 6 дархост, аз Австралия, Ҳиндустон, Индонезия, Корея, Кувайт, инчунин дархости муштарак аз Тоҷикистону Ӯзбекистон ва Қирғизистон тасдиқ шудааст.
Қаблан, Амороти Муттаҳидаи Араб низ дархост дода буд, вале охири моҳи ноябр он бозхонд шуд. Дар назар аст, ки Конфедератсияи футболи Осиё кишвари мизбони ин мусобиқаро соли 2026 эълон кунад. Мусобиқаи Ҷоми футболи Осиё-2027 дар Арабистони Саудӣ баргузор мешавад.
Номзадҳо ба баргузори мусобиқаи Ҷоми футболи Осиё-2035 Австралия, Ҷопон, Корея, Кувейт шуданд.
Мувофиқи итизориҳои КФО, мизбонони ояндаи мусобиқаи солҳои 2031 ва 2035 бояд на танҳо сатҳи баланди тадорукотиро таъмин созанд, балки дар шакли зерсохтор, болоравии таваҷҷуҳ ба футбол ва таҳкими нуфузи байнулмилалии мусобиқа нақши арзанда гузоранд.
Қаблан, Тоҷикистону Қирғизистон ва Ӯзбекистон барои дар соли 2035 баргузор намудани Ҷоми Осиё оид ба футбол дархости муштарак пешниҳод карда буданд.
Қобили зикр аст, ки мизбонони мусобиқа ба таври автоматӣ ба роҳхат барои иштирок дар Ҷоми Осиё соҳиб мешаванд.
Ҷоми футболи Осиё (AFC) шурӯъ аз соли 1956 дар 4 сол 1 маротиба пас аз 1 соли мусобиқаи Чемпионати ҷаҳон гузаронида мешавад. Аз ҳама бештар – 4 бор Ҷоми футболи Осиёро мунтахаби Ҷопон соҳиб шудааст. Охирин мусобиқаи Ҷоми футболи Осиё соли 2023 дар Қатар баргузор шуда, бо ғалабаи соҳибони майдон – футболбозони Қатар анҷом ёфт. Ҷоми футболи навбатии Осиё соли 2027 доир мегардад. Аз соли 2019 дар ин мусобиқа 24 дастаи мунтахаби қора иштирок мекунанд.
