Дирӯз, 6-уми феврал дар шаҳри Масқати Уммон музокироти ҳастаии Эрон ва Амрико бо раҳбарии Аббос Ароқчӣ, вазири корҳои хориҷии Ҷумҳурии Исломӣ ва Стив Уиткофф, фиристодаи вижаи Иёлоти Муттаҳида дар умури Ховари Миёна баргузор шуд.
Ба гузориши расонаҳо, ин гуфтугӯҳо ғайримустақим ва бо миёнҷигарии Бадр ал-Бусаидӣ, вазири хориҷаи Уммон ҳудуди 8 соат давом кард.
Ароқчӣ пас аз анҷоми музокирот ба расонаҳо гуфт, мавзуи гуфтугӯ бо Амрико “сирфан ҳастаӣ” буд ва “дар хусуси ҳеҷ мавзуи дигаре” музокира намекунанд. Ӯ даври аввали музокиротро “шуруи хубе” унвон кард.
Ароқчӣ изҳор доштааст, ки имрӯз ба равшанӣ эълон кардем, ки шарт ва талаботи ҳар музокира ин аст, ки аз таҳдид ва фишор худдорӣ ва интизор дорем, ки ин чиз риоя шавад.
Ба қавли ӯ, дар бораи идомаи музокирот назарҳо мувофиқ буданд ва “қарор шуд, ки музокирот идома ёбад”.
“Вақт ва таърихи музокироти баъдӣ ва шакли он дар машваратҳои оянда тавассути ҷаноби Бадр ал-Бусаъидӣ муайян хоҳад шуд. Фазои хубе ҳоким буд ва шуруи хубе буд”, – изҳор дошт Ароқчӣ.
Вазири корҳои хориҷаии Уммон музкоиротро “бисёр ҷиддӣ” тавсиф карда, гуфтааст, ки “қасд дорем дар замони мувофиқ дубора такшили ҷаласа диҳем, то натиҷаҳои он дар Теҳрон ва Вашингтон баррасӣ шаванд”.
Дертар Доналд Трамп, раисҷумҳури Амрико ҳам ин музокираро шарҳ дод. Ӯ музокиротро “бисёр хуб” тавсиф карда, изҳор дошт, ки “ба назар мерасад, Эрон мехоҳад ба созиш расад”. Ӯ шаби гузашта дар иёлати Флорида ба расонаҳо гуфтааст, ки “аввалҳои ҳафтаи оянда дубора (бо Эрон) дидор хоҳем дошт”.
“Онҳо мехоҳанд ба созиш расанд. Ҳамон гуна, ки бояд ҳам хоҳони тавофуқ бошад. Шумо оқибатҳои ба созиш нарасиданро медонед – паёмадҳо равшананд. Бинобар ин, бояд дид, ки чӣ иттифоқе меафтад. Ин дидор бо яке аз мақомҳои бисёр олирутбаи Эрон баргузор шуд ва хоҳем дид, ки натиҷаи он чӣ хоҳад буд. Дар зимн, агар (тавофуқ) имконпазир бошад, бисёр моил ҳастам, ки ин рӯй диҳад”, – изҳор дошт Трамп.
Раисҷумҳури Амрико дар посух ба саволи рӯзноманигорон дар мавриди он ки Эрон мегӯяд, “музокирот танҳо ҳастаӣ аст ва мавзуъҳои дигареро дарбар намегирад”, кӯтоҳ гуфт, ки “пеш аз ҳама, набояд силоҳи ҳастаӣ вуҷуд дошта бошад”.
Бояд зикр кард, ки Эрон ва Амрико солҳост сари барномаи ҳастаии Теҳрон баҳс доранд ва танишҳо миёни онҳо идома дорад. Амрико мегӯяд, Эрон набояд ба силоҳи ҳастаӣ даст ёбад, Эрон мегӯяд, барномаи ҳастаияш сулҳомез аст.
Дар ин миён, бо миёнҷигарии кишварҳои дигар соли 2015 онҳо тавонистанд ба созиш расанд, аммо соли 2018 Доналд Трамп созишро бекор кард. Баъди он муносибатҳо боз ҳам печида шуд ва дар ниҳоят Амрико дар замони ҷанги 12-рӯзаи Исроил бо Эрон ба чанд пойгоҳи ғанисозии урани Эрон ҳамла кард.
Ҳоло Амрико нерӯҳои ҳарбии ҳавоӣ ва баҳриашро ба атрофи Эрон равон кардааст ва таҳдид дорад, ки дар сурати даст наёфтан ба мувофиқа, паёмадҳои он барои Эрон сангин хоҳад буд. Эрон мегӯяд, омодааст аз худ дифоъ кунад ва зери ҳеҷ фишоре гузашт нахоҳад кард.
