Муҳиддин Асадуллоев, ҷудокори ҷавон ва хушноми тоҷик аз мусобиқоти “Тоскулоҳи бузург”-и Порис 2026 (Paris Grand Slam 2026) бо медали биринҷӣ ва ҷоизаи “Ситораи дар ҳоли тулӯъ” бармегардад.
Ин аввалин медал дар таърихи ҷудои Тоҷикистон дар мусобиқаҳои “Тоскулоҳи бузург”-и Порис (Париж) мебошад.
Муҳиддин Асадуллоеви 19-сола дар рӯзи аввали мусобиқаи “Тоскулоҳи бузург”-и Порис дар вазни то 73 кило, ки дар даври якум озод буд, дар даври дуюм намояндаи Испания Антон Шуҳалиевро мағлуб кард.
Дар марҳилаи ҳаштякниҳоӣ бар ҷудокори мизбон Петер Ҷеан дастболо шуд, вале дар чаҳорякниҳоӣ аз Мануел Ломбардои итолиёӣ мағлуб шуд.
Дар даври тасаллобахш Асадуллоев бар Йессет Куанов аз Қазоқистон пирӯз шуда, дар мубориза барои ҷойи сеюм Даййан Боулемтафеси мизбонро шикаст дод ва соҳиби медали биринҷӣ шуд.
Дар ин вазн Маҳмадбек Маҳмадбеков, тоҷикписаре, ки аз дастаи Имороти Муттаҳидаи Арабӣ намояндагӣ мекунад, барандаи медали тило шуд.
Пас аз ин муваффақият, Федератсияи байналмилалии ҷудо ба Муҳиддин Асадуллоев ҷоизаи “Ситораи дар ҳоли тулӯъ”-и соли 2025-ро тақдим кард. Ин ҷоиза рӯзи 8-уми феврал пас аз анҷоми “Тоскулоҳи бузург”-и Порис ба ҷудокори тоҷик супурда шуд.
Бояд зикр кард, ки Муҳиддин Асадуллоев қаҳрамони ҷаҳон байни ҷавонон аст.
Ҳамчунин, се паҳлавони дигари тоҷик, ки дар ин мусобиқа иштирок доштанд – Абубакр Шеров (-81 кг), Муҳаммадҷон Абдуҷалилзода (-90 кг) ва Абубакри Акобир (-100 кг) ба мубориза натавонистанд соҳиби медал шаванд.
Се ҷудокори дигари тоҷик – Меҳрзод Суфиев (-60 кг), Эмомалӣ Нуралӣ (-66 кг) ва Абубакр Боқиев (-81 кг) ба далели нагирифтани раводид дар “Тоскулоҳи бузург”-и Порис ширкат карда натавонистанд.
Ба иттилои сомонаи расмии Федератсияи байналмилалии ҷудо (IJF), дар мусобиқаи “Тоскулоҳи бузург”-и Порис 488 ҷудокор (299 мард ва 189 зан) аз 78 кишвар ҳунарнамоӣ мекунанд.
Маблағи умумии он 154 ҳазор евроро ташкил медиҳад. Ғолибон дар ҳар як вазн (7 вазн миёни мардон ва 7 вазн байни занон) бо 5000 евро, барандагони медали нуқра бо 3000 евро ва соҳибони медали биринҷӣ бо 1500 евро мукофотонида мешаванд.
Инчунин ғолибону ҷоизадорон ва ширкаткунандагони ин мусобиқаи байналмилалӣ соҳиби имтиёзҳо дар радабандии инфиродии ҷаҳонии ҷудо мешаванд.
