Нусратулло Давлатзода, раиси Кумитаи андози Тоҷикистон иддаои баланд будани сарбории андоз дар кишварро рад кард ва гуфт, "бо мақсади беҳтар кардани вазъи иқисодӣ ва ҷалби сармоя, такмилу таҷдиди низоми андози Тоҷикистон идома дорад".
"Тоҷикистон, чуноне ки аксар вақт иддаъо мешавад, сарбории баланди андоз надорад. Мо пайваста барои коҳиш додани сарбории андоз кор мебарем, то фазои соҳибкориро беҳтар карда, ба меъёрҳои байналмилалӣ мутобиқ бошем", – изҳор дошт Давлатзода зимни нишасти матбуотии рӯзи 13 феврал.
Ӯ илова кард, ки кам кардани шумори андоз ва меъёри онҳо идома дошта, "ба ин васила барои соҳибкорон шароити бештар судманд фароҳам мешавад".
Раиси Кумитаи андоз мисол овард, ки дар пайи ислоҳоти соҳа, соли 2022 теъдоди андозҳо аз 10 то 7 адад кам шуд, ки низоми андозситониро барои тоҷирон содаву осонтар кард.
Ба гуфтаи Нусрутулло Давлатзода, сарбории андоз дар Тоҷикистон аз давлатҳои ҳамсоя баландтар нест. Ҳоло дар Ӯзбекистон — 9 навъии андоз, дар Қазоқистон — 11, дар Қирғизистон — 8, дар Арманистон — 10, дар Озарбойҷон — 13, дар Беларус — 9 ва дар Русия — 15 навъи андоз мавҷуд аст.
Бартарият барои тиҷорат
Номбурда афзуд, тағйирот дар қонунгузории андоз ба коҳиши сарборӣ ва осону соддатар кардаи низоми андозситонӣ ва он дар навбат худ, ба беҳбуди шароит барои роҳандозии тиҷорат дар кишвар мусоидат мекунад.
Ба таъкиди Давлатзода, Тоҷикистон барои беҳтар кардани мавқеъи худ дар радабандиҳои байналмилалӣ кор бурда, ба ҷалби ҳарчи бештар сармоягузориҳои хориҷӣ идома медиҳад.
“Поин бурдани меъёри андозҳо ва соддаву осонтар кардани пешниҳоди ҳисобот, инчунин баланд бардоштани сатҳи шаффофияти тиҷорат ба мустаҳкам намудани иқтисоди кишвар ва муҳайё кардани ҷойҳои нави корӣ кумак мекунад”, – илова кард раиси Кумитаи андоз.
