Соли 2025 дар Тоҷикистон 2560 хоҷагии нави деҳқонӣ таъсис дода шудааст. Ҳоло теъдоди умумии онҳо дар кишвар 200 ҳазору 349 ададро ташкил медиҳад.
Ба иттилои Кумитаи идораи замин ва геодезии Тоҷикистон, аз ин шумор қариб 71 ҳазору 572 хоҷагӣ дар вилояти Суғд, 75 ҳазору 653 адад дар вилояти Хатлон, 16 ҳазору 723 адад дар Вилояти Мухтори Кӯҳистони Бадахшон (ВМКБ) ва 36 ҳазору 4101 хоҷагӣ дар шаҳру навоҳии тобеи ҷумҳурӣ ба қайд гирифта шудааст.
Ба ҳолати 1-уми январи соли 2025 теъдоди саҳмдорон дар хоҷагиҳои деҳқонии Тоҷикистон зиёда аз 796 ҳазору 94 нафарро ташкил медиҳад.
Ба сурати умум, қитъаи замини хоҷагиҳои деҳқонӣ 5 млн 91 ҳазору 223 гектарро ташкил медиҳад, ки ба 73% аз масоҳати умумии заминҳои таъиноти кишоварзӣ баробар аст.
Қитъаи замине, ки ба як хоҷагии деҳқонӣ рост меояд, ба ҳисоби миёна, ҳудуди 25,9 гектар ва ба як саҳмдор 6,4 гектарро ташкил медиҳад.
Бино ба маълумоти Кумитаи замин, дар вилояти Суғд зиёда аз 990 ҳазор гектар замин дар ихтиёри хоҷагиҳои деҳқонӣ, дар вилояти Хатлон зиёда аз 1,1 млн гектар дар шаҳру ноҳияҳои тобеи ҷумҳурӣ ҳудуди 915 ҳазор гектар ва дар ВМКБ зиёда аз 2 млн гектар замин дар ихтиёри хоҷагиҳои дҳқонӣ аст.
Ба иттилои ин ниҳод, тақрибан 40%-и ин заминҳо бо ёрии пойгоҳҳои обкашӣ обёрӣ гардида, масоҳати заминҳои шӯрхок ва серсанг мутаносибан 15% ва 18%-ро ташкил медиҳад. Дар ин заминҳо зиёда аз 90%-и ҳамаи маҳсулоти кишоварзӣ парвариш меёбад, ки ба ҳудуди 25%-и Маҷмӯи маҳсулоти дохилӣ баробар аст.
Бояд гуфт, ки масоҳати заминҳои коршоям барои обёрӣ дар Тоҷикистон 1,57 млн гектар арзёбӣ шуда, аз он 763 ҳазор гектараш азхуд шудааст.
