Қоҳир Расулзода, сарвазири Тоҷикистон рӯзи 18-уми феврал бо Муҳаммад Атобак, вазири санъат (саноат), маъдан ва тиҷорати Эрон, ки бо як сафари корӣ дар Тоҷикистон қарор дорад, дидор ва вазъу дурнамои ҳамкорӣ байни ду кишварро баррасӣ кардааст.
Дар ин бора хабаргузории “Ховар” иттилоъ дода, навиштааст, дар ин мулоқот таъкид шуд, ки тиҷорат байни Тоҷикистону Эрон дар соли 2025 ба 483 миллион доллар расида, назар ба соли 2024-ум 28% афзудааст.
Ба гуфтаи манбаъ, ҷонибҳо, инчунин, ба рушди ҳамкорӣ миёни ду кишвар дар бахшҳои энерҷӣ, саноати коркард, маъдан, кимиё, истеҳсоли масолеҳи сохтмонӣ, кишоварзӣ ва таъсиси корхонаҳои муштарак таваҷҷуҳ кардаанд.
Муҳаммад Атобак ду рӯз пеш ба Тоҷикистон омада буд ва қаблан бо Шералӣ Кабир, вазири саноат ва фанновариҳои навин, Далер Ҷумъа, вазири энерҷӣ ва захираҳои об ва Абдураҳмон Абдураҳмонзода, вазири рушди иқтисод ва савдои Тоҷикистон дидору гуфтугӯ дошт.
Зимни вохӯрӣ, Шералӣ Кабир омодагии Тоҷикистонро ҷиҳати роҳандозии ҳамкориҳо дар саноати кимиё, содироти пахта ва истифода аз бозори Эрон ироа кардааст.
Вазири саноати Эрон низ омодагии кишварашро ба густариши робитаҳои тиҷоратӣ ва афзоиши ҳаҷми табодули мол изҳор дошта, зикр кардааст, ки "Эрон дар соҳаҳои саноати истихроҷӣ кӯҳӣ, коркарди захираҳои минералӣ, дорусозӣ ва саноати нассоҷӣ имкониятҳои зиёд дорад".
Ҷонибҳо зарурати суръат бахшидан ба амалисозии созишномаҳои имзошуда ва бартараф намудани монеъаҳои маъмуриро баҳри расидан ба натиҷаҳои мушаххас дар фаъолияти муштарак таъкид доштаанд.
Қобили зикр аст, ки Эрон ба панҷгонаи кишварҳои асосии шарики тиҷоративу иқтисодии Тоҷикистон дохил мешавад.
Бино ба маълумоти Хадамоти гумруки Тоҷикистон, гардиши молу маҳсулот байни ду кишвар аз 377,7 млн доллар дар соли 2024 то ба 483,9 млн доллар дар соли 2025 зиёд шудааст. Яъне ба маблағи 106,2 млн доллар ё худ ба андозаи ҳудуди 28% зиёд шудааст.
Дар соли 2025 ҳаҷми содироти молу маҳсулот аз Тоҷикистон ба Эрон 112,8 млн доллар ва воридот аз Эрон – 371,2 млн долларро ташкил додааст.
Аз Эрон ба Тоҷикистон аксаран маҳсулоти нафту кимиё, масолеҳи сохтмон ва маҳсулоти хӯрокворӣ содир мегардад.
Ҳамчунин полимерҳо, аз ҷумла полиэтилени навъҳои гуногун, инчунин сементи портланд ва клинкер (масолеҳи сохтмон) низ ҳиссаи назаррас доранд.
Содирот аз Тоҷикистон ба Эрон асосан ба маҳсулоти ашёи хом рост меояд: нахи пахта, ришта (калоба)-и пахтагину коғазӣ, алюминии аввалия ва дигар ашёи хом.
