Соли гузашта додгоҳҳои кишвар аз рӯи ҳамаи парвандаҳо, аз ҷумла аз ҳисоби ҷарима, мусодираи молу мулк, зарари ба давлат расонидашуда ва пардохти боҷи давлатӣ беш аз 216,3 миллион сомонӣ рӯёнида, ба буҷет ворид кардаанд. Ин нишондиҳанда нисбат ба соли 2024-ум беш аз 90,7 миллион сомонӣ зиёд аст.
Дар ин бора Рустам Мирзозода, раиси Додгоҳи олӣ дар нишасти матбуотии рӯзи 12-уми феврал иттилоъ дод.
Ба гуфтаи ӯ, аз ҷумла барои риоя накардани қонун “Дар бораи танзими ҷашну маросим” 1 ҳазору 297 парвандаи маъмуриро (1 ҳазору 435 дар соли 2024) баррасӣ карда, 1 ҳазору 268 касро ҷарима кардаанд. Мақомот аз ин афрод, дар умум 10 млн 989 ҳазору 681 сомонӣ ҷарима ситонидаанд.
Дар соли 2024-ум барои риоя накардани қонуни танзими ҷашну маросим 1 ҳазору 400 нафарро ба маблағи бештар аз 11 млн сомонӣ сомонӣ ҷарима баста буданд.
Инчунин, соли гузашта додгоҳҳои кишвар барои вайрон кардани қонун “Дар бораи масъулият барои таълиму тарбияи кӯдак” 10 ҳазору 536 адад (27 ҳазору 782 дар соли 2024) парвандаи маъмуриро баррасӣ ва нисбати 8 ҳазору 561 нафар дар ҳаҷми 6 млн 957 ҳазору 634 сомонӣ ҷарима татбиқ кардаанд.
Соли 2024 барои вайрон кардани ҳамин қонун аз 23 ҳазору 670 кас ба маблағи зиёда аз 6 миллион сомонӣ ҷарима ситонида шудааст. Омори соли гузашта нишон медиҳад, ки нисбат ба соли 2024-ум шумораи парвандаҳои маъмурӣ кам, вале ҳаҷми ҷаримаҳои ситонидашуда дар Тоҷикистон ба маротиб афзудааст.
Соли гузашта додгоҳҳои кишвар нисбати чанд кас ва чӣ ҷазо таъин карданд?
Тибқи иттилои Додгоҳи олӣ, соли гузашта додгоҳҳои кишвар дар умум, 153 ҳазору 150 парвандаи маданӣ, оилавӣ, ҷиноятӣ, маъмурӣ, дархостҳои мақомоти тафтиши пешакӣ, пешниҳоди муассисаҳои ислоҳӣ ва Хадамоти иҷроро баррасӣ кардаанд. Ин нишондод нисбат ба соли 2024-ум (169 ҳазору 614 адад) 16 ҳазору 464 парванда камтар будааст.
Ба гуфтаи Рустам Мирзозода, додрасҳои кишвар дар соли 2025 алайҳи 13 нафар ҳукми абад содир карданд, ки нисбат ба соли 2024-ум (12 – кас) 1 нафар зиёд аст. Инчунин 5 ҳазору 496 нафар ба муҳлатҳои гуногун аз озодӣ маҳрум гардидаанд.
Дар ин давра, нисбати 1 ҳазору 185 нафар ҷазо дар намуди корҳои ҳатмӣ, 620 кас корҳои ислоҳӣ таъин шуда, алайҳи 7 ҳазору 126 тани дигар ҷарима татбиқ карда шудааст.
Дар Тоҷикистон беш аз 400 додрас фаъолият мекунанд, ки онҳо бо фармони президент таъин ва озод мешаванд. Шикоятҳо дар бораи фаъолияти додрасҳо дар ҷомеа кам нест ва бархе аз фаъолияти нодурусти онҳо шикоят мекунанд.
Эмомалӣ Раҳмон, раиси ҷумҳури кишвар низ борҳо аз кори додрасҳо интиқод ва аз фасодкорӣ дар ин соҳа нигаронӣ карда буд. Раисҷумҳур ду сол қабл дар як мулоқоти хосааш бо додрасҳои тоҷик аз кори онҳо сахт интиқод кард ва гуфт, ки аз ҳама бештар аз кори онҳо шикоят дастрас мекунанд.
Аз ҷумла, дар соли 2025-ум се додрас “бинобар содир намудани кирдоре, ки шаъну эътибори судяро паст мезанад” бо фармони раисҷумҳур аз вазифа барканор шуданд. Дар Додгоҳи олӣ дар шарҳи барканории онҳо гуфтанд, ки ин се додрас даст ба “ҷинояти коррупсионӣ” зада будаанд.
