То ҳол дар Тоҷикистон зиёда аз 120 ҳазор гектар замин ҳамчун манбаъҳои аслии афзоиш ва паҳншавии малах ба қайд гирифта шудааст. Мақомот барои мубориза бо ин ҳашарот аз паҳподҳо (ҳавопаймоҳи бесарнишин) истифода мекунанд. Дар ин бора Вазорати кишоварзӣ хабар медиҳад.
Манбаъ мегӯяд, кор барои ошкор ва нобуд кардани манбаъҳои паҳншавии малах идома дорад. Ба иттилои ин ниҳод, солҳои 2025-2026 дар майдони 246 480 гектар корҳои муоинаву санҷишӣ гузаронида шуда, дар 120 555 гектар замин манбаъҳои паҳншавии ҳашароти зараррасон ба қайд гирифта шудааст.
Ин ниҳод навиштааст, ки малах тухмашро дар хокҳои ғафс дар чуқурии 4-5 сантиметр ва аксаран дар ҷойҳои душворгузар мегузорад, ки ин мубориза бо ин ҳашаротро душвор месозад.
"Дар марҳилаи барвақтии афзоиш, ҳашарот дар гурӯҳҳо ҷудо мешавад, ки ба коркарди пурсамари кимиёвӣ имкон медиҳад. Аммо бо гузаштан марҳилаҳои баъдина, нобудсозии малах душвор мегардад. Малахи калонсол фаъолона ҷой иваз мекунад ва ба расонидани зиёди ҷиддӣ ба заминҳои кишт қодир аст", – гуфтанд аз вазорат.
Ин ниҳод мегӯяд, соли 2025 бори нахуст дар кишвар барои коркарди қаламравҳои сироятёфта, аз паҳподҳо истифода карданд. Тавре Қурбон Ҳакимзода, вазири кишоварзӣ чанде пеш дар як ҳамоиш гуфт, "истифодаи паҳподҳо ба зудтар фарогирии майдонҳои калон, бахусус дар мавзеъҳои душворгузар, кам кардани хароҷоти сӯзишворӣ ва маводи кимиёвӣ, инчунин коҳиши сарборӣ ба муҳити зист имкон медиҳад".
Ҳамчунин, дар доираи лоиҳаи “Рушди чорводорӣ ва чарогоҳҳо” ба муассисаи марбутаи давлатӣ, ду паҳпод дода шудааст, ки аллакай, дар коркарди заминҳо истифода мешаванд.
"Айни замон барои пайгирӣ ва коркарди манбаъҳои паҳншавии ин ҳашароти зараррасон, боз 8 дастгоҳи дигар харида шудааст", – гуфтанд аз ин ниҳод.
Ба таъкиди манбаъ, ба ҷуз паҳподҳо, боз даҳҳо трактор, садҳо обпошакҳои дастӣ ва худкор, зарфҳо барои об ва техникаи махсус дар ихтиёри мутахассисон қарор доранд. Аз Вазорати кишоварзӣ гуфтанд, ки онҳо масъалаи зиёд кардани истифодаи минбаъдаи технологияҳои муосирро дар мавсими имсола баррасӣ мекунад.
Ба иддаои ин вазорат "саривақт ошкор кардан ва нобуд сохтани манбаъҳои афзоиши малах барои эмин мондани ҳосил ва таъмини амнияти озуқаворӣ дар соли 2026 аҳаммияти калидӣ доранд".
