Вазорати мудофиаи Тоҷикистон эълон кард, ки нақшаи даъвати баҳории ҷавонон ба артиш дар 10 рӯзи аввали маъракаи даъват 80,1% иҷро шудааст.
Ин ниҳод рӯзи 11-уми апрел гуфт, ки то кунун Вилояти Мухтори Кӯҳистони Бадахшон ва шаҳри Душанбе нақшаро пурра ба анҷом расонидаанд.
Ба гуфтаи манбаъ, дар 10 рӯз вилояти Хатлон 96,2%, вилояти Суғд 57,5% ва шаҳру ноҳияҳои тобеи ҷумҳурӣ 68,3%-и нақшаи даъвати баҳорӣ ба сафи Нерӯҳои мусаллаҳро иҷро кардаанд.
Мавсими баҳории ҷалби ҷавонон ба артиш дар Тоҷикистон аз 1-уми апрел оғоз шуда, то 31-уми май идома меёбад. Бар асоси фармони раисҷумҳур, ин мавсим ҷавонони аз 18 то 27-сола (солҳои таваллуди 1999-2008) ба артиш даъват мешаванд.
Қаблан, Вазорати мудофиа эълон карда буд, ки дар рӯзи якуми маъракаи баҳории даъват нақшаи он дар тамоми кишвар 54,3% иҷро шудааст.
Ҳамасола бо шуруъи маъракаи давъати ҳарбӣ мавзӯи ҷалби ҷавонон ба артиш дар Тоҷикистон доғ мешавад. Шароити номуносиб, бадрафторӣ бо сарбозон, меҳтарсолорӣ ва марги ҷавонон дар қисмҳои ҳарбӣ аз сабабҳои аслии саркашии ҷавонон аз хидмат дар сафи Қувваҳои мусаллаҳи Тоҷикистон гуфта мешавад.
Ҳамчунин, ҳар сол бо оғози мавсими даъват ба хидмати ҳарбӣ дар шабакаҳои иҷтимоӣ наворҳои латукӯби сарбозон паҳн мешуд ва аз боздошти иҷбории ҷавононписарон аз сӯйи нафарони номаълум дар расонаҳо ва шабакаҳои иҷтимоӣ интишор гардида, вокуниши ҷомеаро ба вуҷуд оварда буд.
Мақомот вуҷуди “облава”- ро ҳамеша рад мекунанд. Аммо мегӯянд, ки дар ҳолати баъди гирифтани даъватнома ҳозир нашудани ҷавонон ба комиссариати ҳарбӣ, мақомоти пулис ҳақ дорад, онҳоро зӯран ҳозир кунад.
Дар Тоҷикистон ҷавонон метавонанд хидмати ҳарбиро бо пардохти маблағ адо намоянд. Хидмати ҳарбии пулакӣ чист ва чӣ гуна метавон онро адо кард, дар ин матлаби мо хонед.
Ҳамчунин, дар ин матлаби мо ба муҳимтарин саволҳо дар бораи хидмати ҳарбӣ посух ёбед: Маъракаи даъвати ҳарбӣ. Ба муҳимтарин саволҳо дар бораи даъват ба хидмати ҳарбӣ посух дарёфтем.
