Бонки исломии рушд дар доираи лоиҳаи “Рушди сайёҳии ҳушманд ва таҳсилот дар соҳаи соҳибкорӣ” ба Тоҷикистон 18,25 млн доллар медиҳад, ки 9,5 млн доллари он қарз аст. Ин маблағҳо аз ҷумла таҳкими барномаҳои ҳушманд, низоми таҳсил ва омода кардани мутахассисон равона мегардад.
Созишномаи қарзиро Маҷлиси намояндагон дар иҷлосияи навбатии парлумон, рӯзи 4-уми апрел баррасӣ ва қабул кардаанд.
Юсуф Маҷидӣ, муовини якуми вазири молия гуфтааст, ки татбиқи лоиҳаи мазкур аз соли 2026 оғоз шуда то соли 2031 идома мекунад.
Ба гуфтаи ӯ, аз маблағи умумӣ 9,5 млн доллар қарз, 4 млн евро маблағгузории омехта омехта ҳамчун лизинг буда, 450 ҳазор доллар грант ва 4,3 млн доллар саҳми Донишгоҳи байналмилалии сайёҳӣ ва соҳибкории Тоҷикистон аст. Шарту шароити гирифтани 9,5 млн доллар қарз маълум нест.
Маҷидӣ гуфтааст, ки ҳадафи лоиҳа беҳтар кардани дастрасӣ ва сифати таҳсилоти олии касбӣ дар соҳаи сайёҳӣ ва меҳмоннавозӣ дар асоси таҷрибаҳои байналмилалӣ мебошад.
Бояд гуфт, созишномаи мазкур байни Тоҷикистон ва Бонки исломии рушд, рӯзи 11-уми феврал дар шаҳри Душанбе имзо шуда буд.
Ҳукумати Тоҷикистон чанд соли охир ба соҳаи сайёҳӣ дар кишвар таваҷҷуҳи бештар дорад ва барои рушди ин бахш лоиҳаҳои гуногунро татбиқ кардааст. Чанде қабл Эмомалӣ Раҳмон, раисҷумҳури Тоҷикистон қарори бунёди “Академияи сайёҳӣ”-ро имзо кард. Ин муассиса дар назди Донишгоҳи байналмилалии сайёҳӣ ва соҳибкории Тоҷикистон таъсис меёбад.
Тибқи иттилои Кумитаи рушди сайёҳӣ, срли гузашта ба Тоҷикистон 1 миллиону 784 ҳазору 454 сайёҳ омадааст, ки назар ба соли 2024-ум 27,5% ё 384 ҳазору 299 нафар бештар будааст.
