Душанбе. 23-уми сентябр. ОИ «Азия-Плюс» – Чанде қабл дар чаҳорчӯбаи татбиқи амалии лоиҳаи зидди маводи мухаддири «МЕДИССА», ки Агентии назорати маводи нашъаовари назди президенти Тоҷикистон ҳамоҳангсози он аст, аз рӯи песаи драматург ва нависандаи маъруфи тоҷик Иноят Насриддин нахустнамоиши спектакли «Қотили ҷонҳо» баргузор шуд.
Намояндаи агентӣ Алишер Ташрифов ба ОИ «Азия-Плюс» хабар дод, ки намоишнома ба мавзӯи фоҷиаи шахсоне, ки барои сарватманд гаштан ба фурӯши нашъа даст задаанд, бахшида шудааст.
Дар нахустнамоиши спектакл намояндагони созмонҳои ҷамъиятии ҷавонон, ҳукумати ноҳияҳо, толибилмони макотиби таҳсилоти умумӣ ва донишҷӯёни коллеҷҳои гуногуни шаҳри Душанбе иштирок намуданд.
«Рӯзҳои наздик нахустнамоиши спектакл тавассути телевизиони миллӣ ба тамошобинон пешкаш карда мешавад», – зикр кард А.Ташрифов.
