Хуҷанд. 11-уми июл. ОИ «Азия-Плюс» – Ҷамъияти саҳомии шакли кушоди (ҶСШК) «Комбинати металлҳои нодири Ленинобод» (КМНЛ), ки дар шаҳраки Чоруқдаррон воқеъ аст, интизор гирифтани иҷозатномаи истихроҷи квартс аст, ки кони он аз корхона каме дуртар ҷойгир шудааст.
Директори генералии комбинат Маҳмуд Холиқов ба ОИ «Азия-Плюс» изҳор дошт, дар сурати гирифтани иҷозатнома, ширкати австриягии «Сторк Ханделсгез МБХ», ки 100 дарсади
саҳмияҳои ҶСШК ба он тааллуқ доранд, омода аст, ҷиҳати бунёди корхонаи истеҳсоли ферросилитсий $25 млн. сармоягузорӣ кунад.
«Гап сари он аст, ки дар кишварҳои собиқи шӯравӣ чунин корхона мавҷуд нест ва дар ҳоли қомат рост кардани корхона ба буҷаи кишвар ҳар моҳ 1 млн. доллари марикоӣ ворид мегардид, – идома дод ӯ. – Пӯшида нест, ки дар ин масъала қазоқону қирғизҳо фаъолу пешсафанд ва барои сармоягузор фарқе нест, ки ба куҷо молиягузорӣ намояд, танҳо мавҷудияти ашёи хом зарур аст».
Мавсуф зикр кард, ки айни замон дар комбинат 8 сех бо иқтидори пурра кор мекунанд. «Аз даст додани чунин сармоягузор ба манфиати кор нест», – афзуд М.Холиқов.
