Имрӯз, соати 10:00 рассоми тоҷик Далер Миҳтоҷов бори аввал дар Тоҷикистон намоиши онлайнии асарҳои тасвиршудаашро дар сомонаи https://dalerart.tj баргузор намуд. Дар ин бора худи рассом ба “Азия-плюс” хабар дод.
Мавсуф гуфт, намоиш зери унвони “Роҳи сурх” баргузор гардид ва меҳмонон метавонанд дар ду толори калони виртуалӣ 52 асари муаллифиро бубинанд, ки мавзӯъҳои гуногуни иҷтимоӣ ва фарҳангиро фаро мегиранд.
Миҳтоҷов гуфт, баргузории намоиши асарҳои рассомӣ тариқи интернет аз як тараф осон ва қулай бошад, аз ҷониби дигар аз чунин намоиш натанҳо шаҳрвандони Тоҷикистон, балки ҳаводорони санъати тасвирӣ аз кишварҳои гуногун дастрасӣ пайдо мекунанд.
Далер дар Душанбе дар ду-се сол як маротиба намоиши асарҳои шахсии худро баргузор мекард. Вай мегӯяд, ки ҳар як рассом ба намоишгоҳҳои доимӣ ниёз дорад, то ки на танҳо асарҳои худро ба мардум намоиш диҳанд ва фикру мулоҳизаҳо ҷамъ оваранд, балки инчунин асарҳои худро барои худ бубинанд.
– Баъзан дар коргоҳ дигар кори худро намебинед, ба онҳо чунон одат мекунед, ки камбудиҳоро пай намебаред, аммо ҳамин ки наққоширо ба ҷои дигар бурдед, дар зери чароғи дигар овезед ва шумо гӯё ба он аз зовияи дигар нигоҳ мекунед, – шарҳ дод Далер.
Охирин намоишгоҳи рассом соли 2018 баргузор шуда, сипас пандемия оғоз ёфт ва дар ин муддат Далер мехост ду маротиба намоишгоҳ ташкил кунад, аммо ноком шуд. Гузашта аз ин, мегӯяд ӯ, ташкили намоишгоҳ кори хеле гаронарзиш аст.
– Аввалан, шумо бояд расмҳо омода кунед: катон (холст) гарон, рангҳо – инчунин, чорчӯбаҳо (рама), баъд, шумо бояд ҳуҷрае иҷора гиред, даъватномаҳо оред, фуршет ташкил кунед – ин ҳама маблағи зиёдро талаб мекунад. Гузашта аз ин, пандемия идома дорад ва баргузории намоишгоҳи зинда хатарнок аст, -мегӯяд Далер.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
