Шаби қадр (Лайлат ал-Қадр) яке аз шабҳои муқаддас дар моҳи Рамазон имсол дар Тоҷикистон ба шаби 16 ба 17-уми март рост меояд. Дар ин бора дирӯз Саидмукаррам Абдулқодирзода, раиси Шӯрои уламои Тоҷикистон ба “Азия-Плюс” хабар дод.
Ба гуфтаи муфтии кишвар, Шаби қадр, ки ба эҳтимоли зиёд шаби 26 ба 27-уми моҳи шарифи Рамазон аст, ба шаби душанбе ба сешанбеи ҳафтаи оянда (шаби 16 ба 17-уми март) рост меояд.
Абдулқодирзода гуфт, ин шаб барои мардуми мусалмон ҷойгоҳи баланд дошта, беҳтарин шаб барои ибодат мебошад ва дар он дуову ибодат зуд иҷобат меёбад.
Тавре сомонаи расмии Шӯрои уламо менависад, маҳз дар Шаби қадр Қуръони карим бар Ҳазрати Пайғамбар (с) нозил шудааст.
“Шабе, ки дар миёни осмону замин ва башарият бо олами улвӣ ва фариштагон робитаи бевоситае барқарор гардид ва дар он нузули Қуръон бар дили поки охирин паёмбари Худо Ҳазрати Муҳаммад (с) оғоз гардид. Шабе, ки ҷаҳони ҳастӣ бо шодмонии нотакроре онро пешвоз гирифт ва ҳодисаеро бо он азамат ва шукӯҳ ҳаргиз надида буд”, – гуфтаанд уламои Тоҷикистон.
Дар сураи “Ал-Қадр”, ба гуфтаи уламои кишвар, ба чаҳор хусусият ва фазилати шаби Қадр ишора шудааст:
1. Нузули Қуръони карим дар ҳамин шаб оғоз гардидааст;
2. Он шаб аз ҳазор моҳ беҳтар мебошад;
3. Фариштагон ва Ҳазрати Ҷабраил (ъ) дар он шаб барои анҷоми корҳои муайяне бо амри Парвардигор ба замин меоянд;
4. Ва он шаб то саҳар дар сар то сари олами офариниш садои салому дуруди офаридагони Худованд баланд мешавад ва дар он то субҳ нуру баракат ва амну осоиш ҳукмфармост, шабест, ки дар он ҷашни ҳамагонӣ дар сар то сари олам баргузор мегардад.
Дар ин шаб мусулмонон ибодати махсус мекунанд, намози шаб (таҳаҷҷуд) мехонанд, Қуръон тиловат мекунанд ва дуоҳои махсус мегӯянд. Инчунин, бисёриҳо тамоми шабро бедор мемонанд ва ба ибодат машғул мешаванд.
Уламои кишвар ҳам менависанд: Аз Абӯҳурайра (р) ривоят аст, ки Расули Худо (с) фармуданд: “Ҳар шахсе шаби Қадрро аз рўи имону ихлос шабзиндадорӣ кунад, Худованд гуноҳони гузаштаашро меомурзад” (Ривояти Бухорӣ ва Муслим).
Ба қавли Шӯрои уламои Тоҷикистон, нишонаҳои шаби Қадр чунинанд:
– Он шаб аз дигар шабҳо нуронӣ мешавад;
– Қалби муъминонро ҳамон шаб оромӣ фаро мегирад
– Дар он шаб ҳаво ором мешавад ва шамоли сахт намевазад.
– Гоҳо шахсони солеҳ шаби Қадр кадом шаб буданашро дар хоб мебинанд. Чунонки баъзе саҳобагон дар хоб диданд.
– Инсон дар он шаб аз намоз ҳаловату лаззат мебарад, ки дар дигар шабҳо он гуна лаззату ҳаловатро ёфта наметавонад.
– Субҳи он шаб офтоб бе шуоъ мебарояд. Убай ибни Каъб (разияллоҳу анҳу) гуфт: Расули Худо саллаллоху алайҳи ва саллам нишонаи шаби Қадрро ба мо хабар дода, фармуданд: "Субҳи он шаб офтоб бе шуоъ мебарояд". (Саҳеҳи Муслим).
Шӯрои уламо бо такя ба ҳадиси Паёмбар (cаллаллоҳу алайҳи ва саллам) дар “Мусаннафи Ибни Абўшайба” омадааст, мегӯянд, “касе, ки аз хайру (баракоти) он шаб маҳрум гардад, маҳруми ҳақиқӣ ҳамон кас аст”.
Ҳазрати Оиша (р) мефармояд, ки аз Расули Худо (с) пурсидам: “Эй Расули Худо (с), агар он шабро дарёфтам, чӣ бигӯям? Фармуданд: Бигӯ: Худовандо! Ту бахшандаӣ ва афву бахшишро ҳатман дӯст медорӣ, пас маро мавриди афву бахшиши Худ қарор деҳ”.
Мавриди таъкид аст, ки аксари олимони ислом бар он ақидаанд, ки шаби қадр дар яке аз шабҳои тоқи даҳаи охири моҳи Рамазон (шабҳои 21, 23, 25, 27 ё 29) меояд. Бисёр мусулмонон шаби 27-уми Рамазонро ҳамчун шаби қадр қайд мекунанд, аммо дақиқан таърихи он маълум нест. Соли гузашта он ба шаби 26 ба 27-уми март, дар рӯзи 27-уми моҳи Рамазон, фаро расида буд.
Ёдовар мешавем, ки ҳоло дар рӯйи ҷаҳон моҳи шарифи Рамазон идома дорад ва мусулмонони олам рӯзадоранд. Рӯзадорӣ ба кӣ фарз аст ва кӣ аз он озод мешавад, инчунин чӣ рӯзаро мешиканад? Муҳимтарин нукот дар бораи Рамазонро дар ин матлаби таҳиякардаи “Азия-Плюс” бихонед. Посух ба 10 суоли муҳим дар робита ба моҳи Рамазон низ дар ин пайванд аст.
Ва тақвими моҳи шарифи Рамазон дар соли 2026-ро ин ҷо дарёфт кунед.
