ЧОРАБИНИҲОИ МУҲИМ
– Имрӯз дар тамоми муассисаҳои табобатии Вилояти Мухтори Кӯҳистони Бадахшон ташхиси тиббии ройгон роҳандозӣ мегардад. Шаҳрвандони ин вилоят метавонанд давоми рӯз дар муассисаҳои тиббии маҳалли худ ташхису муоина ва машварати ройгон гиранд. Ин иқдом дар доираи “Ҳафтаи саломатӣ ва ҳуқуқи инсон дар Тоҷикистон” ва “Рӯзи умумиҷаҳонии саломатӣ” сурат мегирад.
ЯК РӮЗИ ТАЪРИХ
Соли 1980 – Бори аввал дар шаҳри Душанбе Фестивали XIII умумииттифоқии синамо баргузор гардид.
Соли 1992 – Дар Душанбе дар бораи барқарор намудани муносибатҳои дипломатӣ байни Тоҷикистон ва Русия созишнома ба имзо расид.
Соли 2020 – Ҳукумати Тоҷикистон КВД “Оид ба истеҳсол, харид, захира ва фурӯши маҳсулоти аввалия дар шаҳри Душанбе”-ро аз пардохти андоз аз арзиши иловашуда (ААИ) озод кард.
Соли 2020 – Парлумони кишвар маблағгузории идомаи сохтмони нақби “Истиқлол”-ро бо иштироки Эрон тасдиқ намуд.
Ин тасмим барои анҷом додани корҳои боқимонда дар нақб, аз ҷумла насби системаҳои вентилятсия, равшанӣ, назорати бехатарӣ ва оташнишонӣ гирифта шуд. Барои ин корҳо маблағи иловагии 11 миллион доллар ҷудо гардид, ки аз он 5,5 миллион долларро ҳукумати Эрон ва 5,5 миллион доллари боқимондаро ҳукумати Тоҷикистон таъмин намуданд.
Соли 2022 – Лоиҳаи нави Қонуни Ҷумҳурии Тоҷикистон “Дар бораи Палатаи ҳисоби Ҷумҳурии Тоҷикистон” рӯнамоӣ гардид.
ШАХСИЯТҲО
Соли 1925 – Мавлуди Абдумаҷид Пӯладов, табиб, доктори илмҳои тиб, профессор.
Соли 1963 – Зодрӯзи Ато Мирхоҷаи Нерӯ, ҳоло сармуҳаррири “Садои Шарқ” ва собиқ муовини аввали раиси ИНТ.
Ӯ соли 1985 бахши журналистикаи Донишгоҳи давлатии Тоҷикистонро хатм намуда, фаъолияти касбиашро дар рӯзномаи “Комсомоли Тоҷикистон” оғоз кардааст. Баъдан, дар радио, телевизион, Оҷонсии давлатии “Ховар”, рӯзномаи “Ҷумҳурият” ва нашрияҳои дигари ҷумҳурӣ кор кард.
Ато Мирхоҷа яке аз чеҳраҳои адабиёти муосири тоҷик аст, ки соли 1991 нахустин маҷмӯаи ашъораш бо номи “Тасмаи мардон” нашр гардид. Минбаъд китобҳои “Ишқ ва ашк”, “Шакарганҷ”, “Нафаси дувум” ва осори бачагонааш ба нашр расиданд.
Ӯ ҳамчунин тарҷумон буда, осори шоирон ва нависандагони тоҷикро ба забони шуғнонӣ ва асарҳои адибони хориҷиро ба тоҷикӣ гардондааст. Ато Мирхоҷа дар таҳияи китобҳои фарҳангиву луғавӣ низ саҳм гузоштааст.
Ато Мирхоҷа соли 2015 муовини аввали раиси Иттифоқи нависандагони Тоҷикистон таъин шуда, 10 сол дар ин маснад буд ва моҳи ноябри соли 2025 аз ин вазифа барканор шуд. Ҳоло сармуҳаррири маҷаллаи адабии “Садои Шарқ” аст.
Соли 1969 – Мавлуди Шералӣ Султонов, пизишк, ҷарроҳ ва донишманди тоҷик.
Соли 2002 – Зодрӯзи Эмомалии Нуралӣ, ҷудокори шинохтаи тоҷик, қаҳрамони ҷудои ҷаҳон миёни ҷавонон дар соли 2022.
Эмомалии Нуралӣ машқро дар толори варзишии падараш дар деҳа Ҳилолии ноҳияи Хуросон оғоз карда, то ба қаҳрамони ҷаҳон расид.
Баъд аз хатми мактаб Эмомалӣ ба Донишгоҳи давлатии тиҷорати Тоҷикистон ба ихтисоси ҳуқуқшиносӣ дохил шуд. Ҳамзамон, ӯ тамринҳои худро дар Клуби ҷудои Парвиз Собиров оғоз намуд.
Ӯ соли 2022 ҳамчун беҳтарин варзишгар байни ҷавонон дар риштаи варзиши олимпӣ дар Тоҷикистон шинохта шуд.
Эмомалии Нуралӣ ғолиби Чемпионати ҷаҳон оид ба ҷудо байни наврасон дар соли 2022, Ҷоми ҷавонони Осиё 2022 дар Тошканд, “Тоскулоҳи Бузург”-и Тошканд дар 2023 ва “Тоскулоҳи бузург”- Анталия дар соли 2024 мебошад.
Соли 2013 – Зуҳур Ҳабибуллоев, роҳбари гурӯҳи рассомоне, ки тарҳи Парчами давлатии Тоҷикистонро таҳия намуданд, дар 81-солагӣ даргузашт.
Зуҳур Ҳабибуллоев бо тасвири мусаввараҳои нотакрораш дар санъати тоҷик нақши худро гузоштааст. Ӯ муаллифи мусаввараҳои “Сохтмони ГЭС-и Норак”, “Меҳмонхона дар Норак”, “Чӯпонони Қубониён”, “Натюрморти помирӣ” аст, ки баёнгари истеъдоди рассомии ӯянд. Ин мусаввир ҳамчунин дар ороиши бисёр биноҳои маъмурию фарҳангии пойтахт фаъолона иштирок кардааст.
Соли 2021 – Озодамоҳ Муҳтарамова, овозхони тоҷик, Ҳунарпешаи халқии Тоҷикистон дар 65-солагӣ аз олам даргузашт.
Озодамоҳ Муҳтарамова ҳанӯз дар 13-солагиаш дар театри халқии ноҳияи Шӯробод (ҳоло Шамсиддин Шоҳин) ҳамчун овозхон ба фаъолият оғоз мекунад. Ӯ дар ин театр аз Одина Ҳошим, ҳофизи саршиноси тоҷик нозукиҳои мусиқиро меомӯзад.
Баъди хатми мактаби миёна дар соли 1973 дар Театри халқии ноҳияи Ҳамадонӣ ба фаъолият пардохт ва тӯли 27 сол, то соли 2000 он ҷо ҳунарнамоӣ кард. Солҳои 2000-2005 сарояндаи ансамбли этнографии назди раёсати фарҳанги вилояти Хатлон ва аз соли 2006 сарояндаи ансамбли этнографии “Ганҷина”-и Филармонияи давлатии Тоҷикистон буд.
Ӯ беш аз сад суруд офаридааст, ки таронаҳои “Модар”, “Чашми тар”, “Тоҷикистон”, “Танҳоӣ”, “Шаби ҳиҷрон”, “Ошиқон”, “Эй дил”, “Сарви гуландом”, “Рози дил”, “Кӯзаро бишкаста” аз зумраи беҳтарин сурудаҳои ӯ мебошанд.
САНАҲОИ МУҲИМИ ҶАҲОНӢ
Дар Тоҷикистон 8-уми апрел Рӯзи иқтисодчиён таҷлил мешавад. Ин ҷашн мувофиқи тағйиру иловаҳо ба Қонуни Ҷумҳурии Тоҷикистон “Дар бораи рӯзҳои ид”, ки 2 августи соли 2011 қабул шудааст, расмӣ гардид.
Ҳадафи таҷлили ин рӯз арҷгузорӣ ба саҳми иқтисодчиён дар ҳалли масъалаҳои муҳими иҷтимоию иқтисодии кишвар ва таъмини рушди устувори иқтисодӣ мебошад.
Имрӯз Рӯзи байналмилалии ҷӯгиҳо (цгане) таҷлил мегардад. Ин рӯз дар Конгресси якуми ҷаҳонии ҷӯгиҳо, ки 8 апрели соли 1971 дар шаҳри Лондон баргузор шуда буд ва намояндагони 30 кишвар дар он иштирок доштанд, таъсис ёфтааст.
Рӯзи 8-уми апрели соли 1766 аввалин зинапояи оташнишонӣ дар Амрико ба қайд гирифта шуд. Ихтирои он на танҳо кори наҷотбахшонро осон кард, балки ба наҷоти ҷони бисёр одамон мусоидат намуд. Баландии аввалин зинапояи патентшуда камтар аз 10 метр буд. Рекорди баландии зинапояи муосири оташнишонӣ ба зинапояи телескопии автомобилӣ, ки як ширкати финӣ истеҳсол кардааст, тааллуқ дорад. Баландии он 112 метр аст.
ВАЗЪИ ҲАВО*
Дар вилояти Суғд – Ҳавои абрнок пешгӯӣ шуда, борон (дар баландиҳои зиёда аз 2500 метр аз сатҳи баҳр барф) меборад. Ҳарорат: дар водиҳо рӯзона 14+19º гарм, дар ноҳияҳои кӯҳӣ рӯзона 6+11º гарм, дар водиҳо шабона 7+12º гарм, дар ноҳияҳои кӯҳӣ шабона -2+3º.
Дар вилояти Хатлон – Ҳавои абрнок пешгӯӣ шуда, борон меборад. Ҳарорат: дар водиҳо рӯзона 12+17º гарм, дар доманакӯҳҳо рӯзона 7+12º гарм, дар водиҳо шабона 8+13º гарм, дар ноҳияҳои доманакӯҳӣ шабона 5+10º гарм.
Дар шаҳру ноҳияҳои тобеи ҷумҳурӣ – Ҳавои абрнок пешгӯӣ шуда, борон (дар баландиҳои зиёда аз 3000 метр аз сатҳи баҳр барф) меборад. Ҳарорат: дар водиҳо рӯзона 8+13º гарм, дар ноҳияҳои кӯҳӣ рӯзона 10+15º гарм, дар водиҳо шабона 6+11º гарм, дар ноҳияҳои кӯҳӣ шабона 5+10º гарм.
Дар Вилояти Мухтори Кӯҳистони Бадахшон – Ҳавои абрнок пешгӯӣ шуда, дар баъзе ноҳияҳои ғарбии вилоят ва шарқи вилоят борон меборад. Ҳарорат: дар ғарби вилоят рӯзона 15+20º гарм, дар шарқи вилоят рӯзона 4+9º гарм, дар ғарби вилоят шабона 3+8º гарм, дар шарқи вилоят шабона 3-8º сард.
Дар шаҳри Душанбе – Ҳавои абрнок пешгӯӣ шуда, борон меборад. Ҳарорат: рӯзона 11+13º гарм, шабона 6+8º гарм.
Дар шаҳри Хуҷанд – Ҳавои абрнок пешгӯӣ шуда, баъзан борон меборад. Ҳарорат: рӯзона 16+18º гарм, шабона 9+11º гарм.
Дар шаҳри Бохтар – Ҳавои абрнок пешгӯӣ шуда, борон меборад. Ҳарорат: рӯзона 13+15º гарм, шабона 10+12º гарм.
Дар шаҳри Хоруғ – Ҳавои абрнок пешгӯӣ шуда, борон меборад. Ҳарорати ҳаво шабона 7+9º гарм, рӯзона 14+16º гарм мешавад. Ҳарорат: шабона 5+7º гарм, рӯзона 14+16º гарм мешавад.
*Ҳарорати шабонаи ҳаво шаби 8 ба 9-уми апрел ба ҳисоб гирифта шудааст.
