Душанбе. 23-юми июн. ОИ «Азия-Плюс» – Дар гузориши Бонки ҷаҳонӣ таъкид мегардад, ки маҷмӯи маҳсулоти дохилии умумии кишварҳои Аврупои Шарқӣ ва Осиёи Марказӣ ба андозаи 4,7 фоиз коҳиш ёфта, соли 2010 афзоиши иқтисод ҳамагӣ 1,6 фоизро ташкил медиҳад.
Дар гузориш зикр мегардад, ки соли ҷорӣ ҳаҷми маҷмӯи маҳсулоти дохилӣ дар Украина – 9, Русия – 7,5, Молдова ва Тоҷикистон – 3, Белорус – 3,3 ва Қазоқистон – 1,5 фоиз коҳиш меёбад. «Дар ҳамин ҳол, дар як қатор кишварҳои минтақа ММД ба қадри ночиз афзуда, ин нишондиҳанда дар Озарбойҷон – ба 3,3, Ӯзбекистон – 4,5 ва Гурҷистон 1 фоиз бробар хоҳад буд», – омадааст дар гузориш.
Тибқи маълумоти гузориши мазкур, соли 2010 солимгардии иқтисод боиси афзоиши ҳаҷми ММД дар ҳамаи кишварҳои минтақа гардида, ин нишондиҳанда дар Русия – 2,5, Белорус – 2,6, Украина – 1, Озарбоҷон – 5,2 ва Ӯзбекистон – 5,0 фоизро ташкил хоҳад дод.
