Душанбе. 5-уми май. ОИ «Азия-Плюс» – Имрӯз дар пойтахти Тоҷикистон шаҳри Душанбе аввалин муассисаи хусусии таълимии дунявӣ-динии ба номи «Абӯҳанифа» муаррифӣ мешавад. Муассисаи мазкур нахустин мадрасаи мутавасситаи пилотӣ ё намунавӣ дар кишвар мебошад, ки таълимро дар заминаи синтези фанҳои дунявӣ ва динӣ ба роҳ мондааст.
Идеяи ифтитоҳи чуниин муассисаи таълимӣ се сол қабл дар ҷараёни фаъолияти Муколимаи дунявиён ва дингароён пайдо шуда буд. Дар муддати се сол аз ҷониби якчанд гурӯҳҳои корӣ, ки аз мутахассисони шинохтаи дунявӣ ва фақеҳњони исломӣ иборат буданд, барномаи таълимӣ тартиб дода шуд. Ҳамчунин, барои муаллимони оянда тренинги омӯзишӣ гузаронида шуд, ки дар он барномаи вежаи таълимӣ аз санҷиш гузашт.
Дар мадрасаи намунавӣ фанҳои дунявӣ ва динӣ баробар таълим дода мешаванд, то ин ки хатмкунандагони он донишҳои васеи чи динӣ ва чи дунявӣ дошта бошанд.
Феълан дар муассисаи таълимии намунавӣ 20 нафар ҷавонписарону ҷавондухтарон таълими дунявӣ ва динӣ мегиранд. Ба онҳо устодони варзидаи фанҳои дунявӣ ва динӣ, тибқи барномаи муназзам ва нақшаи таълимӣ дарс мегӯянд.
Ба муассисаи таълимӣ ҳама хоҳишмандоне, ки мактаби таҳсилоти ҳамагониро хатм намудаанд, қабул карда мешаванд. Дар ин бора директори муассисаи хусусии таълимии дунявӣ-динии ба номи «Абӯҳанифа» – Алиев Рабӣ Юнусович хабар дод.
