Душанбе. 4-уми август. ОИ «Азия-Плюс» – Чанде қабл муовини раиси ширкати саҳомии холдинги кушодаи «Барқи тоҷик Уғулой Хоҷаева ба рӯзноманигорон изҳор дошт, ки кормандони ширкат тавассути чархбол қуллаҳои кӯҳҳои Тоҷикистонро назорат карданд ва дар натиҷа маълум шудааст, ки дар кӯҳҳо барф намондааст.
«Акнун танҳо ба болоравии ҳарорат аз 45 дараҷа зиёдтар умед мебандем, зеро чунин ҳарорат ба барфшавии пиряхҳо муосидат мекунад ва то мавсими гармидиҳӣ обанбори Норак дар сатҳи зарурӣ бо об пур мешавад», – гуфт ӯ. Мувофиқи маълумоти ширкати «Барқи тоҷик», соли гузашта обанбор дар сатҳи зарурӣ то 17-уми сентябр пур шуда буд, имрӯз бошад, то сатҳи зарурӣ боз 17 метри дигар мондааст.
Ба иттилои сухангӯи ширкат Нозирҷон Ёдгорӣ, тайи ду рӯзи ахир бар асари баландшавии ҳарорати гармӣ то 44-45 дараҷа сатҳи воридшавии об ба обанбор то 1 ҳазору 760 метри мукааб расидааст, ки ин нишондиҳандаи баландтарин дар соли равон мебошад. «Дар ин муддат сатҳи оби обанбор беш аз
1 метр
зиёдтар шуд», – афзуд Н.Ёдгорӣ.
Ёдрас мекунем, ки вазири энергетика ва саноати Тоҷикистон Гул Шералӣ дар нишасти матбуотӣ изҳор дошта буд, ки меъёри истифодаи барқ дар Тоҷикистон пас аз 9-уми сентябр ҷорӣ мегардад.
Дар ҳамин ҳол, муовини сармуҳандиси ширкати саҳомии холдингии кушодаи «Барқи тоҷик» Рустам Раҳимов дар нишасти матбуотӣ гуфт, ки дар ҷумҳурӣ ҷорӣ кардани реҷаи маҳдуди истифодаи барқ шояд аз моҳи август оғоз гардад ва ширкат бо чунин дархост ба ҳукумат муроҷиат кардааст.
