Душанбе. 22-уми август. ОИ «Азия-Плюс» – Иёлоти Муттаҳидаи Амрико (ИМА) ба Тоҷикистон барои таҳкими амният маблағҳои иловагӣ ҷудо мекунад. Имрӯз дар шаҳри Душанбе бо назардошти ҷудо намудани маблағҳои иловагӣ маросими ба имзорасии ворид намудани тағйирот ба созишномаи байниҳукуматии ҳамкории Тоҷикистону ИМА дар соҳаи амният баргузор мешавад.
Аз Сафорати ИМА дар Тоҷикистон ба мухбири ОИ «Азия-Плюс» хабар доданд, ки созишномаи мазкур ҳамчунин роҳандозии чорабиниҳои мубориза бар зидди маводи мухаддир ва таҳкиму беҳбуди фаъолияти мақомоти ҳифзи ҳуқуқи Тоҷикистонро низ дар бар мегирад.
Асноди ҳамкориро сафири ИМА дар Тоҷикистон Трейси Энн Ҷейкобсон ва вазири умури хориҷии Тоҷикистон Ҳамрохон Зарифӣ ба имзо мерасонанд. Маросими ба имзо расидани созишнома дар Вазорати умури хориҷии Тоҷикистон доир мегардад.
