Душанбе. 15-уми сентябр. ОИ «Азия-Плюс» – Аз дафтари матбуоти Сарраёсати нерӯҳои марзбонии Кумитаи давлатии амнияти миллии Тоҷикистон ба ОИ «Азия-Плюс» хабар доданд, ки дар самти Шӯроободи сарҳади Афғонистону Тоҷикистон (250 километри ҷанубии Душанбе) бар асари задухӯрди мусаллаҳона ду марзбони
тоҷик ба ҳалокат расиданд.
«Шабона гурӯҳи масъули мудофиаи сарҳад бо марзшиканони афғон дучор гашта, задухӯрди мусаллаҳона ба вуқӯъ мепайвандад ва дар натиҷа лейтенант Ибодулло Исҳоқов ва сарбози қаторӣ Наврӯзмалик Каримов кушта мешаванд», – изҳор дошт манбаъ.
Бино ба иттилои манбаъ, задухӯрд зиёда аз ду соат идома ёфта, марзшиканонро аз қаламрави Афғонистон низ бо оташфишонӣ дастгирӣ намудаанд. «Ба марзшиканони афғон муяссар гашт, ки дар қаламрави Афғонистон худро паноҳ гиранд», – афзуд сарчашма.
