Душанбе. 27-уми ноябр. ОИ «Азия-Плюс» – Чанде қабл дар мулоқоти вазири кишоварзии ҷумҳурӣ Қосим Қосимов ва сафири Исроил дар Тоҷикистон Эҳуд Гол дурнамои густариши ҳамкориҳои ду кишвар дар бахши кишоварзӣ мавриди муҳокима қарор гирифт.
Тавре сухангӯи вазорати кишоварзии ҷумҳурӣ Нарзулло Додобоев ба ОИ «Азия-Плюс» хабар дод, дар вохӯри имконоти роҳандозии ҳамкориҳои муштарак ҷиҳати ҷорисозии фановариҳои тоза дар бахши рустанипарварӣ, паррандапарварӣ, гармхонаҳо ва ғайра баррасӣ шуданд.
Қ.Қосимов барои дастгирии ташкили курсҳои омӯзишӣ дар доираи Маркази ҳамкории байнулмилалии «МАШАВ»-и Вазорати умури хориҷии Исроил ба дипломат изҳори миннатдорӣ намуд. Ғайр аз ин, Қ.Қосимов ҷиҳати рушди ҳамкориҳо дар соҳаҳои пахтакорӣ, парваришу истеҳсоли зироатҳои ғалладонагӣ ва тухмипарварӣ пешниҳодҳои ҷолиб кард.
Ба қавли Н.Додобоев, сафири Исроил омодагии кишварашро баҳри густариши минбаъдаи ҳамкориҳо, ҷалби коршиносони Исроил ба Тоҷикистон ва омӯзиши мутахассисони тоҷик дар ин кишвар баён намуд. Дар маҷмӯъ, ҷонибҳо ба мувофиқа расиданд, ки барои густаришу тавсеъаи ҳамкориҳо дар бахши кишоварзӣ
миёни кишварҳо имконоти бузург мавҷуданд.
