Душанбе. 22-уми декабр. ОИ «Азия-Плюс» – Аввалҳои соли оянда дар шаҳри Роғун нуқтаи хизматрасонии мошинҳои боркаши «БелАз»-и Белоруссия ифтитоҳ мегардад.
Тавре сардори хадамоти матбуоти Вазорати энергетика ва саноати ҷумҳурӣ Тоҷинисо Азизова ба ОИ «Азия-Плюс» хабар дод, ҳафтаи гузашта зимни боздиди муовини аввали вазир Маҳмадшариф Ҳақдодов бо муовини аввали вазири умури хориҷии Белорус Игор Петришенко дар бораи таъсиси сохтори хизматрасонии Иттиҳодияи истеҳсолии «БелАз» дар Тоҷикистон тавофуқ ҳосил шуд. И.Петришенко ҳамраиси комиссияи байниҳукуматии Тоҷикистону Белорус оид ба масоили ҳамкории иқтисодиву тиҷоратӣ мебошад.
Ба гуфтаи манбаъ, тайи ду соли ахир Тоҷикистон беш аз 200 адад мошинҳои навъи «БелАз»-ро харидорӣ намудааст ва соли оянда барои идомаи сохтмони нерӯгоҳи «Роғун» харидории техникаи иловагӣ ва ҳамчунин тракторҳои корхонаи тракторбарории Минск (МТЗ) дар назар аст.
Ёдрас мекунем, ки айни замон дар Тоҷикистон корхонаи муштараки Тоҷикистону Эрон оид ба истеҳсоли трактор амал мекунад. Тибқи тасдиқи коршиносон, ин тракторҳо аз тракторҳои истеҳсоли Белорус ҳеҷ камӣ надошта, хароҷоти сӯзишворӣ дар онҳо нисбатан камтар аст ва гузашта аз ин, арзишашон низ пасттар аст.
